II Ho 19 - Sơ̆p Hlabơar Nơ̆r 'Bok Kei-Dei

Jêhu chrih kơ Jêhôsaphat

¹ Jêhôsaphat, pơtao Juđa wih brŏk hiôk-hian tơ hnam pơtao sư tơ pơlei Jêrusalem.

² Jêhu kon drŏ-nglo Hanani, bơngai 'bôh adrol, lĕch năm sơng pơtao Jêhôsaphat păng khan: “Ih tơgŭm kơ lu bơngai pơm kơnê̆ păng 'mêm kơ lu bơngai areh kơ Kră Yang hă? Yua kơ noh, Kră Yang hil kơ ih.

³ Mă-lei lăm ih kư̆m đei tơdrong 'lơ̆ng, ih đei pơrăm lê̆ boih lu gơ̆ng rup yang Asêra đơ̆ng lăm char ih păng ih kư̆m đei pơkă wă chă Kră Yang 'Bok Kei-Dei!”

Jêhôsaphat pôk ăn lu 'bok sek tơlang

⁴ Jêhôsaphat oei tơ pơlei Jêrusalem, đơ̆ng noh sư năm chă dăr lăng lu kon pơlei đơ̆ng pơlei Bêrsêba truh tơ tơring kông groi Êphraim chông ba lu sư wih brŏk tơ Kră Yang 'Bok Kei-Dei 'bok lu sư.

⁵ Sư pôk lu 'bok sek tơlang lăm rim pơlei kơjăp lăm dêh char Juđa.

⁶ Sư khan kơ lu 'bok sek tơlang: “Iĕm athei bơ̆jang mă pơ'lơ̆ng, yua kơ iĕm sek tơlang ưh kơ sĭ kơ sek kơ kon bơngai ôh, mă-lei kơ Kră Yang; Sư gô oei hơdai lu iĕm tơ rim wơ̆t wă sek tơlang.

⁷ Thoi noh, na hli yom bĕ kơ Kră Yang athei sek tơlang mă 'lơ̆ng, yua kơ Kră Yang lu bơ̆n Sư tơpăt, ưh kơ mơ̆t minh pah, ưh kơ đei pơdê bu kư̆m ưh kơ đei iŏk jên đe răt.”

⁸ Lăm pơlei tih Jêrusalem Jêhôsaphat kư̆m chă rơih iŏk đơ̆ng lăm lu bơngai Lêwi, lu 'bok soi păng yŏng kơdră Isơrael wă kơ sek tơlang lu tơdrong pơjah pơjăng băl kiơ̆ tơdrong juăt Kră Yang. Lu sư oei bơ̆jang lăm pơlei tih Jêrusalem.

⁹ Sư tơtă kơ lu sư: “Lu iĕm athei hli yom kơ Kră Yang, iŏk jơhngơ̆m 'lơ̆ng tơpăt hơnơ̆ng păng bơ̆jang hăm đĭ jơhngơ̆m.

¹⁰ Tơdah đei lu 'nhŏng oh kon pơlei pơla đơ̆ng lăm pơlei nai năm tơkan tơ iĕm đei tơdrong truh, pơlôch bơngai dah pơm glăi kơ khôi juăt, nơ̆r tơtă, tơdrong juăt, nơ̆r tơbăt lu iĕm athei bơtho khan kơ lu sư 'nĕ kơ pơm yoch hăm Kră Yang, kơnh Kră Yang hil mĭl phak lu iĕm păng lu 'nhŏng oh iĕm: Pơm thoi ei na lu iĕm huay kơ đei yoch.”

¹¹ Pơtao pôk ăn Amaria 'bok soi tơm pơm yŏng sek tơlang kơ tơdrong pơm glăi hăm khôi juăt Kră Yang păng Sêbadia kon drŏ-nglo Ismael, pơm yŏng kơdră bơngai Juđa, Sư pơm yŏng sek tơlang tơdrong glăi hăm teh đak pơtao păng kư̆m iŏk lu bơngai Lêwi pơm 'bok sek tơlang tơgŭm.” Pơtao kư̆m đei pơkă dơ̆ng: “Lu iĕm athei mă nuih na bơ̆jang! Kră Yang oei hơdai hăm lu bơngai pơm 'lơ̆ng tơpăt.”