II Ho 17 - Sơ̆p Hlabơar Nơ̆r 'Bok Kei-Dei

Jêhôsaphat pơtao đe Juđa

¹ Jêhôsaphat kon drŏ-nglo Asa iung pơm pơtao pơgơ̆r pơtrơp kơ 'bă sư, sư pơgơ̆r dêh char sư kơjăp wă tơblah hăm bơngai Isơrael.

² Sư chă dan lê̆ lu linh tơ lăm rim pơlei mă đei pơm kơjăp lăm char Juđa, pơm kơđông kơjăp lăm char Juđa păng lăm pơlei char Êphraim mă pơtao Asa 'bă sư đei blah iŏk.

³ Kră Yang oei hơdai hăm Jêhôsaphat, yua kơ sư yak kiơ̆ trong 'bok Đawit, ưh kơ kiơ̆ yang Baal ôh,

⁴ mă-lei chơchă Kră Yang 'bă sư pơm kiơ̆ wei răk nơ̆r Kră Yang tơtă, ưh kơ pơm kiơ̆ ôh thoi lu bơngai Isơrael pơm.

⁵ Thoi ei na Kră Yang ăn kơ dêh char sư kơjăp lăm ti sư; đĭ-đăng bơngai Juđa ra pơyơ̆r ăn kơ Jêhôsaphat tơmam, sư mơdrŏng tih tơpă păng đe ư-ang.

⁶ Sư đei jơhngơ̆m hiôk kơjăp kiơ̆ trong Kră Yang; kư̆m oei đei pơrăm lê̆ lu anih kơjung păng lu rup yang Asêra lăm char Juđa.

⁷ Sơnăm mă pêng lăm chăl Jêhôsaphat pơgơ̆r, sư wơh lu yŏng kơiĕng sư Bênhail, Ôbadia, Sachari, Nêthanel păng Mikaia lu sư năm chă bơtho tơ'bôh tơ jơ̆p pơlei lăm char Juđa;

⁸ Kŭm đei lu bơngai Lêwi kiơ̆ lu sư noh. Sêmaia, Nêthania, Sebadia, Asahel, Sêmiramôt, Jêhônathan, Adonija, Tôbija păng Tôpadônija; kư̆m đei lu 'bok soi Êlisama păng Jêhôram kư̆m năm kiơ̆ hơdai.

⁹ Lu sư năm chĕp hla bơar khôi juăt Kră Yang năm tơ jơ̆p lu pơlei bơtho tơbăt ăn kơ kon pơlei pơla lăm char Juđa,

¹⁰ Kră Yang ăn kơ đĭ-đăng dêh char tăp dăr kơ dêh char Juđa hli kơ Kră Yang, pơm kơ lu sư ưh kơ pơ̆n tơblah hăm Jêhôsaphat.

¹¹ Lu bơngai Philistin chĕp jên hu tơmam năm ba pơyơ̆r ăn kơ Jêhôsaphat, lu bơngai Arâp kư̆m lei-lăi năm ba pơyơ̆r ăn tơpơh-rơbâu tơpơh-hrĕng tŏ triu tơno păng tơpơh-rơbâu tơpơh-hrĕng tŏ bơbe tơno.

¹² Jêhôsaphat jing rai tih rai pran tŏk ling-lang, sư pơm anih kơđông linh kơjăp păng đei lu hnam mong tơmam tơ lu pơlei lăm char Juđa.

¹³ Sư đei mong mŭk tơmam lơ lăm char Juđa, sư đei lu linh nuih pran kơtang lăm pơlei tih Jêrusalem.

¹⁴ 'Nâu đe chih jô̆ kiơ̆ kơ hnam dơnŏ 'bă sư: Đơ̆ng adrĕch Juđa, lu yŏng pơgơ̆r rơbâu rơbâu 'nu linh: Noh đei Atnah yŏng pơgơ̆r kơ pêng-hrĕng rơbâu 'nu linh nuih pran kơtang hơdai hăm sư,

¹⁵ yŏng mă 'bar noh Jêhôhanan sư pơgơ̆r 'bar-hrĕng tơhngam-jĭt rơbâu 'nu linh hơdai hăm Sư,

¹⁶ yŏng mă pêng noh Amasia kon drŏ-nglo Sikri, minh 'nu bơngai bơ̆jang kơ Kră Yang hăm jơhngơ̆m hiôk, sư pơgơ̆r 'bar-hrĕng rơbâu 'nu linh nuih kơtang hơdai hăm sư.

¹⁷ Đơ̆ng adrĕch Bênjamin: Đei Êliađa minh 'nu linh nuih kơtang sư pơgơ̆r 'bar-hrĕng rơbâu 'nu linh chĕp hră hăm khêl hơdai hăm Sư,

¹⁸ yŏng mă 'bar noh Jêhôsabat sư pơgơ̆r đei minh-hrĕng tơhngam-jĭt rơbâu 'nu linh chĕp hơmăt tơmam tơblah hơdai hăm Sư.

¹⁹ Lu đe âu bơ̆jang tơgŭm pơtao, 'nguaih kơ lu sư pơtao kư̆m dan lu bơngai nai lăm lu pơlei tih kơjăp tơ jơ̆p lăm dêh char Juđa.