II Ho 12 - Sơ̆p Hlabơar Nơ̆r 'Bok Kei-Dei

Sisăk mơ̆t blah pơlei Jêrusalem

¹ Wă Rêhôbôam pơgơ̆r dêh char sư pran kơjăp boih, na sư păng lu bơngai Isơrael kiơ̆ Sư achăng lê̆ ưh pă kiơ̆ khôi juăt Kră Yang.

² Lăm sơnăm mă pơđăm lăm chăl pơtao Rêhôbôam, yua kơ lu sư đei pơm yoch hăm Kră Yang, na Sisăk, pơtao đe Êyiptơ, tŏk blah Jêrusalem,

³ chĕp ba minh-rơbâu 'bar-hrĕng gre aseh păng tơdrâu-jĭt rơbâu 'nu linh hao aseh; kư̆m đei lu linh đơ̆ng char Libia, Sukki păng char Êthiôpi tŏk hơdai đơ̆ng Êyiptơ, lơ tơpă.

⁴ Sisăk đei blah iŏk lu pơlei tih kơjăp lăm char Juđa dĭng truh tơ pơlei tih Jêrusalem.

⁵ Sêmaia 'bok khan lê̆ adrol năm tơ Rêhôbôam păng lu bơngai pơgơ̆r char Juđa oei akŭm lăm pơlei Jêrusalem wă kơdâu ôn hli kơ Sisăk păng khan: Kră Yang khan thoi âu: “Lu iĕm achăng lê̆ Inh, lei na Inh kư̆m achăng lê̆ lu iĕm lăm ti Sisăk,”

⁶ Kră pơgơ̆r bơngai Isơrael păng pơtao lu sư tơjur akâu tơbral păng khan: “Kră Yang 'lơ̆ng tơpăt.”

⁷ Wă Kră Yang 'bôh lu sư tơbral đei hloi nơ̆r Kră Yang khan kơ Samaia thoi âu: “Yua kơ lu sư tơjur akâu tơbral boih, Inh ưh pă pơlôch lu sư; mă-lei wă jah tơgŭm dŏng lu sư Inh ưh pă yua ti Sisăk tuh tơdrong Inh hil tơ pơlei Jêrusalem dơ̆ng.

⁸ Ăn kơ lu sư chu Sisăk, wă kơ lu Sư băt chu yom kơ Inh pha kơ chu kơ lu pơtao kơpal teh âu.

⁹ Sisăk pơtao đe Êyiptơ, tŏk blah Jêrusalem, iŏk đĭ tơmam gĭt đơ̆ng lăm hnam Kră Yang păng đơ̆ng lăm hnam pơtao; kư̆m iŏk lu khêl maih đơ̆ng Sôlômôn pơm.

¹⁰ Pơtao Rêhôbôam pơm dơ̆ng khêl hăm kong păng pơjao ăn kơ lu yŏng pơgơ̆r gak wei-lăng 'măng jang hnam pơtao.

¹¹ Rim wơ̆t mưh pơtao wă mơ̆t lăm hnam Kră Yang, na lu linh gah 'măng năm sơng chĕp khêl noh, đang boih tah pơdrâu lê̆ khêl noh tơ anih lu bơngai gak 'măng.

¹² Đơ̆ng pơtao băt tơjur akâu tơbral, na Kră Yang, ưh pă hil ưh kơ đei pơrăm đĭ; tơpă kư̆m đei tơdrong 'lơ̆ng mơ̆n lăm char Juđa.

¹³ Thoi noh pơtao Rêhôbôam pơm kơ sư kơdih kơjăp oei lăm pơlei Jêrusalem, Rêhôbôam 'nao puăn-jĭt mônh sơnăm kơplah sư pơm pơtao, sư pơgơ̆r lăm mơjĭt-tơpơh sơnăm lăm pơlei Jêrusalem, pơlei mă Kră Yang đei rơih iŏk đơ̆ng lăm adrĕch Isơrael, wă 'măn anăn Sư tơ noh; mĕ Rêhôbôam anăn Naama, bơngai Ammôn.

¹⁴ Rêhôbôam pơm kơnê̆, yua kơ sư ưh kơ chơchă Kră Yang ôh lăm jơhngơ̆m sư.

¹⁵ Dôm tơdrong jang Rêhôbôam pơm đơ̆ng blŭng-a truh tơ tôch đei chih lăm sơ̆p hla bơar Sêmaia bơngai khan lê̆ adrol păng Iđô bơngai roi lê̆ adrol chih, gah adrĕch 'bok sư Rêhôbôam păng Jêrôbôam tơblah băl hơnơ̆ng đĭ chăl bre sư pơgơ̆r.

¹⁶ Rêhôbôam lôch pơdơh hăm lu 'bok yă sư, 'bŭ lăm pơlei Đawit; Abija kon drŏ-nglo sư pơm pơtao pơgơ̆r pơtrơp đơ̆ng sư.