II Ho 1 - Sơ̆p Hlabơar Nơ̆r 'Bok Kei-Dei

Sôlômôn apinh tơdrong gơh hơgei

¹ Sôlômôn, kon drŏ-nglo Đawit pơgơ̆r dêh char pơtao sư pran kơjăp; Kră Yang 'Bok Kei-Dei oei hơdai sư ăn kơ sư pran kơjăp tih dêh tơpă.

² Sôlômôn pơma hăm đĭ-đăng bơngai Isơrael: Lu yŏng pơgơ̆r minh-rơbâu 'nu linh yŏng pơgơ̆r minh-hrĕng 'nu linh, lu 'bok sek tơlang păng lu yŏng kơdră lăm adrĕch bơngai Isơrael,

³ Sôlômôn păng đĭ-đăng Kon pơlei năm hơdai tŏk tơ anih kơjung tơ pơlei Gibeôn, yua kơ Bơsŭn Anih Akŭm Môis đĭch đam Kră Yang đei pơm pơdơ̆ng tơ char glă oei tơ noh.

⁴ Đawit đei chĕp ba bơih Hom tơdrong pơgơ̆p Kră Yang 'Bok Kei-Dei đơ̆ng Kiriat. Jêarim ba tơ anih Đawit đei hơmet bơih wă dan Hom noh, yua kơ Đawit đei pơm bơih bơsŭn wă dan Hom Pơgơ̆p noh tơ Pơlei Jêrusalem.

⁵ Gah chơnang soi păng kong mă Bêsalel, kon drŏ-nglo Uri, sâu Hur pơm boih dan 'bơ̆t anăp Bơsŭn Anih Akŭm Kră Yang; Sôlômôn hăm lu tơpôl akŭm chă Kră Yang tơ noh.

⁶ Sôlômôn tŏk tơ anih chơnang soi kong dan 'bơ̆t anăp Kră Yang, tơ Bơsŭn Anih Akŭm; na sư pơyơ̆r minh-rơbâu tŏ tơmam soi 'buh tơ kơpal chơnang soi noh.

⁷ Lăm măng noh, Kră Yang 'Bok Kei-Dei tơ'bôh kơ Sôlômôn păng khan: “Ih wă kơ Inh ăn kơ ih kiơ? Apinh bĕ.”

⁸ Sôlômôn tơl Kră Yang 'Bok Kei-Dei khan: “Ih đei tơ'bôh boih tơdrong 'mêm tih kơ 'bă inh Đawit păng kư̆m ăn kơ inh pơm pơtao pơtrơp sư.

⁹ Ơ Kră Yang 'Bok Kei-Dei, apinh Ih pơsĭt bĕ nơ̆r Ih đei pơkă pơ'ngam hăm 'bă inh Đawit, gơh jing yua kơ Ih đei pôk inh pơm pơtao boih wă wei pơgơ̆r lu adrĕch adrung lơ kơdrâ̆m thoi 'mui teh âu.

¹⁰ Thoi ei, apinh Ih ăn kơ inh gơh hơgei đei đon hlôh wao wă kơ inh gơh pơgơ̆r kon pơlei pơla 'nâu yua kơ bu kĕ wei-lăng pơgơ̆r kon pơlei Ih lơ kơdrơ̆m dêh thoi âu?”

¹¹ Kră Yang 'Bok Kei-Dei khan kơ Sôlômôn: “Yua kơ ih đei boih jơhngơ̆m thoi noh, ưh kơ apinh ôh tơdrong mơdrŏng mơng, đe pơyom, dah tơdrong wă pơrăm lu bơngai pơm kơnê̆ kơ ih păng kư̆m ưh apinh wă kơ arih sot, mă-lei apinh tơdrong gơh hơgei đei đon hlôh wao wă kơ wei-lăng pơgơ̆r kon pơlei pơla Inh; kon pơlei mă Inh ăn kơ ih pơm pơtao,

¹² Lei Inh ăn boih tơdrong gơh hơgei đei đon hlôh wao kơ ih: Inh kư̆m gô ăn kơ ih đei mŭk tơmam mơdrŏng tih, đe pơyom dĭng mah lu pơtao mă adrol dah đơ̆ng rŏng kơ ih kư̆m ưh kơ đei bu thoi noh.

¹³ Thoi noh Sôlômôn wih đơ̆ng anih kơjung tơ Gibeôn, dơ̆ng 'bơ̆t anăp Bơsŭn Anih Akŭm, wih brŏk tơ pơlei Jêrusalem. Păng sư pơgơ̆r hloi bơngai Isơrael.

¹⁴ Sôlômôn akŭm lu gre aseh păng aseh, đei minh-rơbâu puăn-hrĕng tŏ gre aseh păng mơjĭt-'bar rơbâu tŏ aseh; 'măn lê̆ lăm pơlei tah gre aseh kư̆m hơdai hăm pơtao lăm Pơlei Jêrusalem.

¹⁵ Pơtao akŭm mong lu hu maih lăm Pơlei Jêrusalem lơ thoi tơmo hơga păng akŭm 'măn 'long hơngo lơ thoi 'long hơra bri lăm thŭng dơnă.

¹⁶ Sôlômôn răt lơ aseh đơ̆ng dêh char Êyiptơ păng char Kue đơ̆ng lu bơngai mơdro kơ pơtao răt, 'long sư hơnơ̆ng kơ đe.

¹⁷ Lu Sư răt ba đơ̆ng dêh char Êyiptơ lu gre aseh minh pôm gre dang tơdrâu-hrĕng sêikơl jên hu, lu aseh minh pôm minh-hrĕng pơđăm-jĭt sêikơl jên hu; lu đe âu kư̆m tĕch dơ̆ng kơ lu pơtao đe Hêtit păng pơtao dêh Siri.