Hôsia 6 - Sơ̆p Hlabơar Nơ̆r 'Bok Kei-Dei

¹ Bĕ bơ̆n, jah wih brŏk tơ Kră Yang, Sư hek lê̆ lu bơ̆n boih, mă-lei Sư gô pơklaih bơ̆n; Sư đei teh pơjĭ bơ̆n, mă-lei Sư gô ming rơka noh.

² Đơ̆ng rŏng kơ 'bar năr Sư gô pơrih bơ̆n; truh năr mă pêng Sư gô tơiung bơ̆n, na bơ̆n gô arih 'bơ̆t anăp Sư.

³ Bĕ bơ̆n chơchă wă kơ băt Kră Yang. Ăn kơ bơ̆n băt kơnăl mă nhen Kră Yang. Tơdrong Sư truh sĭt tơpă thoi măt 'năr lĕch gah pơgê hrôih, Sư truh tơ lu bơ̆n thoi đak 'mi, thoi 'mi jur chruh kơ teh tuch-luch bơyan.

⁴ Inh wă pơm liơ kơ lu iĕm, ơ bơngai Êphraim? Inh wă pơm liơ kơ lu iĕm, ơ bơngai Juđa? Iĕm 'mêm thoi tŭk pơgê hrôih, thoi đak ngom 'bônh kơ hrĕng.

⁵ Yua kơ thoi noh na Inh đei ăn boih lu bơngai khan lê̆ adrol pơbral lu iĕm, Inh pơlôch boih lu iĕm hăm nơ̆r pơma đơ̆ng 'bơ̆r Inh. Tơdrong Inh sek tơlang lĕch thoi hơdah măt 'năr lĕch.

⁶ Inh wă kơ iĕm 'mêm mă sĭt, hloh kơ wă iĕm pơyơ̆r tơmam soi. Wă kơ iĕm băt kơ Kră Yang 'Bok Kei-Dei hloh, kơ wă ôh iĕm pơyơ̆r tơmam soi 'buh.

⁷ Mă-lei thoi Ađam,a lu sư pơm glăi boih kơ đêl nơ̆r pơkă pơgơ̆p, thoi noh lu sư pă tơpăt boih kơ Inh.

⁸ Gileat jơ̆ pơlei lu bơngai pơm kơnê̆, jơ̆ng lu sư juă tă kơ pham ngăl.

⁹ Thoi lu bơngai kơnê̆ răp lu bơngai yak rok trong ei, lu 'bok soi kư̆m wang pơm; thoi noh mơ̆n lu sư pơlôch bơngai rok trong năm tơ pơlei Sichem, tơpă lu sư pơm boih tơdrong kơnê̆ dêh!

¹⁰ Lăm adrĕch Isơrael Inh 'bôh boih tơdrong kơnê̆ dêh, lu bơngai Êphraim pơm pơyô kư̆ kă, Isơrael 'mê̆-'mach boih!

¹¹ Ơ Juđa, ih kư̆m lei-lăi, Inh đei hơmet ăn kơ iĕm boih năr Inh sek tơlang Layơ Inh wă dŏng pơklaih bơngai Isơrael.