Hôsia 3 - Sơ̆p Hlabơar Nơ̆r 'Bok Kei-Dei

Roi pơtih kơ 'bok khan lê̆ adrol iŏk oei kơ drŏ-kăn pơm đi

¹ Kră Yang khan kơ inh: “Năm 'mêm bĕ kơ akăn ih mă drŏ-kăn pơm đi, đei pơm pơyô boih; 'mêm kơ sư thoi Kră Yang oei 'mêm kơ kon pơlei Isơrael, mă khan lu sư kiơ̆ yang nai păng 'maih sa 'bĕng plei hơmu 'ngam.”

² Thoi noh Inh đei răt boih bơngai drŏ-kăn noh hăm mơjĭt-pơđăm sêkơla hu păng 'ba tơ'bâu minh hômerb minh puăt.

³ Na inh khan kơ sư: Ih athei oei păng inh đunh năr; 'nĕ kơ pơm pơyô, dah chă oei klo nai, Inh pơm hăm ih thoi noh mơ̆n.

⁴ Bơngai Isơrael kư̆m oei lơ năr thoi noh, ưh kơ đei pơtao, ưh kơ đei yŏng pơgơ̆r, ưh kơ đei soi pơyơ̆r, ưh pă đei chơnang soi, ưh pă đei Ephot dah Thêraphin.

⁵ Đơ̆ng rŏng kơ noh lu bơngai Isơrael gô wih chơchă Kră Yang 'Bok Kei-Dei lu sư păng Đawit pơm pơtao lu sư. Lu sư gô wih brŏk păng hli tơrơ yom kơ Kră Yang păng tơdrong 'lơ̆ng hiôk-hian lăm năr hơtuch kơnh.