Hôsia 14 - Sơ̆p Hlabơar Nơ̆r 'Bok Kei-Dei

Krao lu bơngai Isơrael wă kơ tơbral

¹ Ơ lu bơngai Isơrael, wih brŏk bĕ tơ Kră Yang, 'Bok Kei-Dei iĕm; yua kơ đơ̆ng tơdrong kơnê̆ lu iĕm, na lu iĕm pơ̆k huŏng boih.

² Krao apinh bĕ 'bơ̆t anăp Kră Yang, păng jah wih brŏk bĕ tơ Sư. Khan bĕ kơ Sư thoi âu: Pơklaih bĕ dôm tơdrong kơnê̆ lu nhôn, apinh Ih 'mêm mơnat sơng iŏk lu nhôn, wă kơ lu nhôn gơh pơyơ̆r nơ̆r bơnê đơ̆ng 'bơ̆r lu nhôn.

³ Lu bơngai Asiri ưh kơ gơh pơklaih lu nhôn ôh; lu nhôn ưh pă hao aseh tơblah dơ̆ng, ưh pă khan dơ̆ng yang lu nhôn! Mă man hăm ti lu nhôn noh, yua kơ Ih đĕch mơnat kơ lu kon mơti.

⁴ Inh gô ming pơklaih tơdrong lu sư blơ̆ blĕch kơ Inh, Inh 'mêm tơpă kơ lu sư boih, Inh pă hil kơ lu sư boih.

⁵ Inh gô jing thoi đak ngom kơ bơngai Isơrael, lu sư gô pơkao thoi pơkao hla tŏng-mŏng păng kư̆m chăt rơh thoi tơm 'long hơngo char Liban.

⁶ Đơ̆ng tơmơ̆ng lu sư bluh rai kơjung; arih 'lơ̆ng sư thoi tơm 'long ôliwơ, 'bâu phu lu sư thoi 'bâu phu 'long hơngo Liban.

⁷ Lu sư gô wih ngôi ala yơ̆p Inh. Lu sư gô iung bluh dơ̆ng thoi tơnơm 'ba. Lu sư gô pơkao thoi pơkao 'long hơmu, păng đe ư-ang sư thoi đe ư-ang đak sik plei hơmu char Liban.

⁸ Ơ lu bơngai Êphraim, Inh wă pơm kiơ dơ̆ng hăm lu rup yang? Inh boih gô drơ̆ng tơdrong lu iĕm krao khan păng wei-lăng lu iĕm. Inh thoi minh tơnơm 'long hơngo hla iĕ hơdrih ling-lang đơ̆ng Inh boih mă lu iĕm đei plei.

⁹ Bu jing bơngai hơgei, sư athei băt hlôh dôm tơdrong âu? Bu mă băt lăng hơlen, sư athei lăng bĕ lu tơdrong noh. Trong Kră Yang 'lơ̆ng tơpăt, lu bơngai tơpăt gô yak trong noh; mă-lei lu bơngai pơm yoch glăi gô yak kơtơih pơ̆k tơ noh.