Hôsia 13 - Sơ̆p Hlabơar Nơ̆r 'Bok Kei-Dei

Kră Yang hil mĭl kơ Isơrael

¹ Rim wơ̆t bơngai Êphraim pơma, lu đe hli tơtơ̆; đe pôk hơtŏk lu sư lăm char Isơrael. Mă-lei lu sư yoch boih yua kơ đơ̆ng kơkuh kơ yang Baal na pơm kơ lu sư lôch.

² Dang ei, lu sư pơm yoch rai dêh; lu sư yua hu, tuh hling pơm lơ rup yang kơ lu sư kơdih, pơm lu rup yang kiơ̆ kơ đon hơgei lu sư; đĭ-đăng ti lu sư thơ̆ hơgei! Đe đei roi trŏ kơ 'bơm lu sư khan: Pơm yang kơ rup kon rơmo păng chŭm rup kon rơmo noh!

³ Thoi noh lu sư nhen thoi tŭk pơgê hrôih kư̆m thoi iĕ kơ đak ngom pơgê 'bônh kơ hrĕng, kư̆m thoi hơkam ba kial bơbơ̆t đơ̆ng anih juă 'ba, thoi 'nhui lĕch đơ̆ng 'măng-'mŏk.

⁴ Inh boih Kră Yang 'Bok Kei-Dei lu iĕm dŏng iĕm lĕch đơ̆ng char Êyiptơ. Lăp minh Inh đĕch, iĕm 'nĕ kơ đei yang nai; 'nguaih kơ Inh ưh kơ đei yang kiơ nai mă gơh dŏng pơklaih iĕm!

⁵ Inh boih wei rong iĕm lăm char glă păng anih hrĕng kro sơ̆.

⁶ Lăp lu sư sŏng sa phĭ boih, jơhngơ̆m lu sư jing pơang; yua kơ đơ̆ng noh na lu sư hiơt boih kơ inh.

⁷ Thoi noh, Inh gô pơm kơ lu sư thoi dăm-brang, Inh gô thoi djrang răp lu sư rok trong.

⁸ Inh gô châu lu sư thoi chơgơu yŏng bruh kơ đe rôp tơgar iŏk kon sư. Inh gô châu hek hơđah kơtơh lu sư, đơ̆ng noh inh gô kăp sa lu sư thoi dăm-brang yŏng. Lu sem bri gô hek sa lu sư.

⁹ Ơ lu bơngai Isơrael, Inh gô pơrăm iĕm, yua kơ lu iĕm sơngah păng blah Inh, Tơ'ngla mă dŏng tơgŭm iĕm.

¹⁰ Dang ei tơ yơ pơtao iĕm juăt ngăl dŏng pơklaih iĕm? Tơ yơ đĭ-đăng lu yŏng pơgơ̆r iĕm lăm rim pơlei? Tơ yơ lu yŏng mă lu bơngai iĕm ngăl khan: Ăn kơ lu nhôn đei minh 'nu pơtao păng lu yŏng pơgơ̆r!

¹¹ Inh ăn pơhil boih kơ lu iĕm minh 'nu pơtao, păng yua kơ Inh hil na inh pơdrâu lê̆.

¹² Tơdrong kơnê̆ lu bơngai Êphraim Inh oei 'blŏk, tơdrong yoch lu sư Inh kư̆m chih 'măn lê̆.

¹³ Tơdrong jĭ thoi drŏ-kăn tơpŭ truh boih kơ lu sư, mă-lei lu sư thoi kon nge ngŏk kơ hlôh kơwao, Lăp truh jơ 'năr boih, mă-lei sư ưh kơ jah lĕch đơ̆ng tơpu kon.

¹⁴ Inh gô dŏng pơklaih lu sư đơ̆ng tơdrong pran kơtang dêh atâu, păng gô pơklaih lu sư đơ̆ng tơdrong lôch. Ơ tơdrong lôch tơ yơ tơdrong lôch hơbuh gơh pơrăm? Ơ dêh atâu tơ yơ tơdrong ih gơh pơrăm. Inh pă gơh mơnat boih.

¹⁵ Mă khan Êphraim đei pơjing rai lơ hloh kơ lu 'nhŏng oh sư, mă-lei kial đơ̆ng gah hơlĕch gô truh, wă khan kial Kră Yang đơ̆ng char glă, gô truh pơhrĕng pơhrơ̆ lê̆ tu đak, păng pơhrơ̆ lê̆ kro lu sơlŭng đak sư, Lu bơngai ayăt gô blah tơgar iŏk lu tơmam gĭt đơ̆ng lăm hnam mong tơmam sư.

¹⁶ Bơngai Samari gô pŭ tơdrong yoch, yua kơ lu sư iung blah Kră Yang 'Bok Kei-Dei sư. Lu sư gô pơ̆k lôch yua kơ đao gưm, lu kon hơ'lơ̆p sư đe gô teh pơlôch păng lu drŏ-kăn mă oei anăp đe gô roch klak.