Hôsia 11 - Sơ̆p Hlabơar Nơ̆r 'Bok Kei-Dei

Kră Yang 'Bok Kei-Dei 'mêm dêh kơ kon pơlei Isơrael

¹ Kơplah Isơrael oei 'lơ̆p, Inh 'mêm dêh kơ lu sư, păng Inh krao kon drŏ-nglo Inh lĕch đơ̆ng dêh char Êyiptơ.

² Lu bơngai Isơrael Inh rai krao lu sư, lu sư rai kơdâu ôn ataih đơ̆ng Inh; lu sư kư̆m oei pơyơ̆r tơmam soi kơ rup yang Baal, păng kư̆m oei soh 'long 'bâu phu kơ lu rup yang nai.

³ Mă khan lei ră, Inh boih pơhrăm bơngai Êphraim gơh yak nơnăm, iŏk ti lu sư na tơiung păng pơklaih lu sư, mă-lei lu sư ưh kơ băt ôh.

⁴ Inh đei yua boih tơdrong mơnat thoi tơlei akar, păng yua tơlei tơ̆n akar tơdrong 'mêm dui lu sư. Inh plôh lê̆ boih 'long ăt trăp đơ̆ng hơko lu sư, păng drap pôk ăn tơmam sa 'me 'bơ̆t 'bơ̆r lu sư.

⁵ Lu sư ưh pă wih hơlơ̆k tơ dêh char Êyiptơ dơ̆ng, mă-lei bơngai Asiri gô pơm pơtao lu sư, yua kơ lu sư arăng kơ̆l ưh kơ wă wih brŏk tơ Inh.

⁶ Đe gô pơrăm tơ rim pơlei lu sư hăm đao gưm, pơrăm lê̆ 'long chơkăl 'măng jang lu sư, pơlôch lu sư yua kơ tơdrong lu sư chă đon kơnê̆.

⁷ Lu kon pơlei Inh pơkă wă achăng lê̆ Inh ngơ-ngei khan đe krao lu sư wih tơ Kră Yang Tih Hloh, ưh kơ đei bu iung wih.

⁸ Ơ Êphraim, liơ Inh gơh achăng ih, Ơ Isơrael, liơ Inh gơh jao lê̆ lu iĕm kơ đe? Liơ Inh gơh ăn pơm kơ lu iĕm jing thoi pơlei Atma, dah liơ Inh gơh pơm kơ lu iĕm thoi pơlei Sêbôim? Jơhngơ̆m Inh sơngah ưh kơ wă pơm tơdrong noh păng jơhngơ̆m Inh 'mêm kơeng đĭ tơtŏ dêh boih.

⁹ Inh pơgơ̆t jơhngơ̆m tơtŏ Inh, păng Inh ưh kơ wă pơlôch pơrăm boih Êphraim, Yua kơ Inh jơ̆ Kră Yang 'Bok Kei-Dei, ưh kơ trŏ kon bơngai ôh. Inh Tơ'ngla rơgoh 'lơ̆ng 'bơ̆t anăp lu iĕm, ưh kơ wă hil pơrăm lu iĕm ôh.

¹⁰ Sư gô grĕnh thoi dăm-brang, na lu bơngai Isơrael gô kiơ̆ rŏng Kră Yang, mưh Sư arum, na kon sâu Sư đơ̆ng gah bơmơ̆t gô truh hli tơtơ̆.

¹¹ Lu sư gô hli tơtơ̆ wih đơ̆ng dêh Êyiptơ thoi sem păr, thoi sem pơgâm đơ̆ng char Asiri, păng Inh tơbrŏk lu sư tơ hnam lu sư kơdih Kră Yang khan thoi noh.

¹² Lu bơngai Êphraim hơlĕnh kơ Inh lu kon pơlei Isơrael pơm plơ̆ plĕch. Mă-lei lu bơngai Juđa oei kiơ̆ Kră Yang 'Bok Kei-Dei, oei kiơ̆ Tơ'ngla 'lơ̆ng rơgoh tơpă sĭt.