Hôsia 1 - Sơ̆p Hlabơar Nơ̆r 'Bok Kei-Dei

Tơdrong bơngai Isơrael ưh kơ chu

¹ Đei nơ̆r Kră Yang khan kơ Hôsia, kon drŏ-nglo Bêri, lăm chăl Usia Jôtham Ahas, Hesekia, lu pơtao đe Juđa. Lăm chăl Jêrôbôam, kon drŏ-nglo Jôas pơm pơtao đe Isơrael.

² Kơplah Kră Yang pơtơm khan kơ Hôsia, Kră Yang khan kơ sư: Năm bĕ, iŏk oei kơ akăn luĕl 'blal păng pơjing kon pơm kư̆ kă yua kơ lăm dêh char âu pơm pơyô kư̆ kă kơnê̆ dêh, đei achăng lê̆ Kră Yang.

³ Thoi noh Hôsia iŏk hĭ Gômer, kon adruh Diblaim, drŏ-kăn noh anăp na tơpŭ ăn minh 'nu kon drŏ-nglo.

⁴ Na Kră Yang khan kơ sư: “Athei krao anăn sư Jêsreel, yua kơ ưh pă đunh dơ̆ng boih, Inh gô phak adrĕch Jêhu yua kơ pham lu bơngai sư pơlôch tơ Jêsreel păng Inh gô pơtôch lê̆ dêh char Isơrael.

⁵ Lăm năr noh Inh gô gơ̆ lê̆ hră lu bơngai Isơrael tơ lăm Thŭng Jêsreel.”

⁶ Akăn sư anăp dơ̆ng na tơpŭ ăn kơ sư minh 'nu kon drŏ-kăn, na Kră Yang khan kơ Hôsia: “Ih krao anăn sư Lôruhama, yua kơ Inh ưh pă đei 'mêm mơnat dơ̆ng boih kơ adrĕch Isơrael, wă kơ Inh kư̆m ưh pă mơnat pơklaih tơdrong yoch kơnê̆ lu sư dơ̆ng.

⁷ Mă-lei Inh gô 'mêm mơnat kơ adrĕch Juđa; Inh Kră Yang 'Bok Kei-Dei lu sư gô dŏng pơklaih lu sư, Inh ưh kơ pơklaih lu sư hăm hră dah hăm đao gưm ôh; dah tơdrong tơblah, hăm aseh, dah hăm bơngai hao aseh ôh.

⁸ Truh tơ Lôruhama pă mŏm boih, mĕ sư anăp tơpŭ dơ̆ng minh 'nu kon drŏ-nglo.

⁹ Kră Yang khan kơ Hôsia: “Anăn bĕ sư Lôami, yua kơ lu iĕm ưh pă jing kon pơlei Inh dơ̆ng boih, noh wă khan Inh kư̆m ưh pă jing Kră Yang 'Bok Kei-Dei lu iĕm dơ̆ng.”

¹⁰ Mă-lei ră kon sâu Isơrael gô jing lơ thoi chuơh cheng đak dơsĭ, ưh kơ kĕ kơ jô̆, pă kĕ tơng. Kơplah noh kơnh, ki Inh krao lu iĕm âu ưh pă trŏ kon pơlei Inh boih, na dang ei Inh gô krao lu iĕm jing kon Kră Yang 'Bok Kei-Dei mă arih ling-lang.

¹¹ Kon sâu Juđa păng kon sâu Isơrael gô pơgơ̆p băl; păng gô pơjing pôk minh 'nu pơm yŏng pơgơ̆r đĭ-đăng lu sư đơ̆ng noh lu sư gô rai lơ lăm teh đak noh, yua kơ năr Jêsreel noh năr tih tơpă.