Hơri Hiôk 6 - Sơ̆p Hlabơar Nơ̆r 'Bok Kei-Dei

Buăl sư

¹ Pơyô ih năm tơ yơ? Ơ bơngai 'lơ̆ng guăng hloh kơ lu adruh nai? Pơyô ih weh trong ayơ, Wă kơ nhôn kư̆m wang chă sư hơdai ih?

Adruh

² Bơngai mă inh hơyuh jur năm lăng pơgar sư boih. Pơgar pơkao 'bâu phu; Wă pơhiôk jơhngơ̆m sư lăm pơgar, Păng phĕ lu pơkao kok jơk;

³ Inh jing tơmam kơ bơngai mă inh hơyuh, Păng bơngai inh hơyuh jing tơmam inh; Sư pơhiôk jơhngơ̆m sư lăm pơgar đei pơkao kok jơk.

Tơdăm

⁴ Ơ bơngai mă inh hơyuh, ih guăng thoi pơlei Tirsa, đei ai hơbŏ thoi pơlei Jêrusalem, Ih pơm ăn kơ đe hyưp kơ măt thoi 'bôh linh yơ̆r hla-kơ.

⁵ Ih hue bĕ măt tơ nai, Yua kơ măt ih pơm kơ inh ưh kơsŭk. Sŏk ih thoi khŭl bơbe kơdâu, jur rok cheng kông Gileat.

⁶ Hơnĕnh ih nhen thoi khŭl triu akăn, 'Nao tŏk đơ̆ng hum. Đĭ-đăng tă kơ tuh 'bar 'bar ngăl. Ưh kơ đei yŏng ayơ mă ưh kơ đei kon.

⁷ Meng ih gom păng che dơ'bŭm Nhen plei gărnăt.

⁸ Đei tơdrâu-jĭt akăn tơm pơtao Đei tơhngam-jĭt 'nu akăn kơnhŏng Păng lơlap lơlang adruh hơlai.

⁹ Sem kơtơp inh bơngai guăng tôm tĕch, Minh 'nu sư đĕch. Kon pôm mĕ sư kơeng. Ưh kơ đei pơm kơnê̆ kiơ ôh hăm mĕ sư bơngai mă tơpŭ kơ sư. Lu adruh 'bôh sư krao sư bơngai đei pŭn hiôk; Dĭng mah akăn tơm păng akăn kơnhŏng pơtao pơư kơ sư ngăl.

¹⁰ “Bơngai adruh âu bu kih? Lăng 'brưch dang 'năr wă lĕch, 'lơ̆ng guăng thoi khei rang, hơdah thoi măt 'năr. Ih gơh pơm kơ đe hiưp kơ măt thoi 'bôh linh yơ̆r hla-kơ!”

Tơdăm

¹¹ Ih jur lăng pơgar plei Hơmu. Wă lăng pơkao lăm thŭng, Wă kơ lăng lu tơm hơmu tam bluh tơmơ̆ng ưh. Tơm gărnăt tam pơkao ưh.

Adruh

¹² Đon inh tơchĕng, thoi apo 'bôh 'băi inh oei tơ lăm gre aseh. Gah 'ngiĕo kơ kon pơtao inh kon pơlei

Kon pơlei

¹³ Ơ adruh Sulam, brŏk bĕ, brŏk bĕ, jah brŏk bĕ, brŏk bĕ, wă kơ lu nhôn gơh 'bôh ih Adruh Yua kơ kiơ lu iĕm oei lăng kơ adruh Sulam. Thoi lăng khŭl Mahanaim suang.