Hơri Hiôk 5 - Sơ̆p Hlabơar Nơ̆r 'Bok Kei-Dei

Tơdăm

¹ Ơ mŏ adruh inh, ŭnh om inh, inh mơ̆t lăm pơgar inh boih! Inh dônh 'long pơgang 'bâu phu inh, Inh sa hơkoh sut păng đak sut inh. Inh huch đak hơmu păng đak toh inh.

Buăl sư Ơ lu bôl buăl, huch sa bĕ; Buăl sư Ơ buăl mă inh 'mêm, huch mă hrăp bĕ! Adruh

² Măt inh tep, mă-lei đon inh oei hơđơ̆r. Noh jơ̆! Nơ̆r pơyô inh sư dơdŭ păng krao thoi âu:

Tơdăm “Pơih bĕ kơ inh 'măng, mŏ adruh inh, pơyô inh, sem kơtơp inh, bơngai 'lơ̆ng hơiă tôm tơdrong; Yua kơ tŭk 'bĕnh kơ inh boih, Sŏk inh hơiuh kơ đak ngom kiơ̆ kơmăng” Adruh

³ Inh plôh lê̆ ao 'nguaih boih. Liơ gơh hrŭk sư dơ̆ng. Inh ôp lê̆ jơ̆ng inh 'lơ̆ng boih, Liơ inh gơh ăn kơ sư trôk dơ̆ng.

⁴ Pơyô inh 'bot ti sư tơ bơlôh chơkăl 'măng, Jơhngơ̆m inh chhưu pơpơ̆ yua kơ sư.

⁵ Inh iung wă pơih kơ pơyô inh 'măng Inh tơdjoh pơgang 'bâu phu tơ hơnglâu ti inh, Đak pơgang 'bâu phu ro hloi tơ chơkăl 'măng

⁶ Inh pơih 'măng kơ pơyô inh, Mă-lei sư hlôi weh tơ nai boih, Jơhngơ̆m inh pơngê̆ 'bơ̆t sư oei pơma. Inh chă sư, mă-lei ưh kơ 'bôh, Inh krao sư, mă-lei pă tơl boih.

⁷ Lu bơngai gak dăr pơlei tơ'bơ̆p inh; Lu sư teh inh, mah rơka, Lu bơngai gak dur iŏk lê̆ hơdrao inh gom.

⁸ Ơ lu adruh Jêrusalem, inh pơkă kơ lu iĕm, Tơdah iĕm tơ'bơ̆p pơyô inh, roi ăn kơ sư. Inh jĭ jơhngơ̆m yua kơ hơyuh kơ sư.

Buăl sư

⁹ Pơyô ih 'lơ̆ng hloh kơ pơyô đe nai hă? Ơ bơngai 'lơ̆ng guăng hloh lăm lu adruh? Pơyô ih đei kiơ 'lơ̆ng kơ pơyô đe nai? Na ih mah pơkă kơ nhôn thoi noh?

Adruh

¹⁰ Pơyô inh noh 'lơ̆ng 'bak 'breo. 'Lơ̆ng guăng hloh kơ lăm mơjĭt-rơbâu 'nu tơdăm.

¹¹ Kơ̆l sư thoi maih gĭt Sŏk sư gĕnh, găm thoi ak.

¹² Măt sư thoi sem kơtơp oei jê̆ đak glung; 'Nhao rơgoh hăm đak toh măt sư hlăng thoi jơmŏng.

¹³ Meng sư dơ'bŭm thoi pơgar pơkao 'bâu phu, 'bâu phu đông jơ̆p-jang. Hơkŭng dreng drao nhen thoi pơkao jơk kok, Lĕch đak pơgang 'bâu phu ngăl.

¹⁴ Ti sư hơpôm thoi đing maih, hling hrâu hăm tơmo gĭt. Akâu sư tơlôih thoi bơla hrâu hăm tơmo rang.

¹⁵ Jơ̆ng sư thoi jrăng tơmo kok gĭt, Đe pơdơ̆ng kơpal hơnă maih. Đe lăng sư hơbŏ thoi kong char Liban, 'lơ̆ng hơiă thoi 'long Hơngo bri.

¹⁶ Nơ̆r pơma sư hơbôn dêh, Đe lăng sư rŏ kơ hưch tơpă, Noh boih pơyô inh păng buăl inh, Ơ lu adruh pơlei Jêrusalem. Buăl sư