Hơri Hiôk 4 - Sơ̆p Hlabơar Nơ̆r 'Bok Kei-Dei

Pơma dơnuh adruh tơdăm hơyuh băl

¹ Ơ bơngai mă inh hơyuh. Ih 'lơ̆ng hơbŏ, ih rŏ liĕm ngei ngei! Muh măt ih gom hăm che. Lăng măt ih nhen măt sem kơtơp. Sŏk ih nhen thoi bơbe kơdâu jur Tơ cheng kông Gileat.

² Hơnĕnh ih chhĭnh thoi sŏk triu Đe 'nao yuă tŏk đơ̆ng hum Đĭ-đăng tă kơ tuh 'bar 'bar ngăl, Ưh kơ đei yŏng ayơ mă ưh kơ đei kon.

³ Hơkŭng ih 'breo thoi brai thêt, 'Bơ̆r ih rơ'buch hơiă. Meng ih gom păng che dơ'bŭm Nhen plei gărnăt.

⁴ Hơko ih nhen thoi hnam thôt Đawit, Man pơdơ̆ng wă tah tơmam tơblah, Đĭ-đăng Rơbâu tŏ khêl tơ'băk tơ noh. Thoi khêl đe 'măn lê̆ kơ lu bơngai nuih wă tơblah.

⁵ 'Bar pah toh ih hmŭng hmăng Thoi kon kơtŏng kơmar. Oei chă sa 'nhĕt tŏk-bŏk pơkao kok jơk.

⁶ Dĭng 'brưch hơdah păng măng mu hiong đĭ, Inh gô tŏk tơ kông 'long 'bâu phu. Inh gô truh tơ groi pơgang 'bâu phu

⁷ Ơ bơngai mă inh hơyuh, ih 'lơ̆ng hơiă tôm tĕch. Akâu ih ưh kơ đei 'bơ̆t ayơ mă kơnê̆.

⁸ Ơ ŭnh om inh, yak hơdai bĕ ba đơ̆ng char Liban. Yak bĕ ba. Weh đơ̆ng kơpal kông Amana. Đơ̆ng wĕch kông Sanir păng kông Hermôn, Đơ̆ng hơgơp trôm dăm-brang, đơ̆ng kông lu djrang oei.

⁹ Jơhngơ̆m inh huŏng đĭ lăm ih boih, ơ mŏ adruh inh, ŭnh om inh, Đơ̆ng lăp ih gơ'mreh măt lăng tơ inh hăm đơ̆ng inh 'bôh ih 'băk hơnam gĭt, na jơhngơ̆m inh huŏng đĭ lăm ih Ô 'ngam dêh tơdrong hơyuh.

¹⁰ Ơ mŏ adruh inh, ŭnh om inh! Tơdrong hơyuh ih 'lơ̆ng 'ngam hloh kơ sik hơmu. 'Bâu phu đak pơgang đơ̆ng ih 'bâu 'lơ̆ng hloh kơ lu tơmam 'bâu phu nai!

¹¹ Ơ ŭnh om, hơkŭng ih lĕch đak sut. Tơ hơpiĕt ih đei đak sut păng đak toh; 'Bâu phu đơ̆ng hơbĕn ao ih, thoi 'bâu phu đơ̆ng char Liban.

¹² Ơ mŏ adruh inh, ŭnh om inh, ih thoi pơgar tang lê̆, Thoi tu đak đe chĭt lê̆, thoi đak glung đe bơ̆ găn lê̆ boih.

¹³ Đĭ 'long ih jing minh hlak pơgar, Plei 'long gărnăt păng đei plei sa 'ngam 'lơ̆ng. Thoi lu pơkao hêna păng 'long 'bâu phu.

¹⁴ 'Long 'bâu phu păng pơkao gôh, alamôs păng 'long hol. Hăm đĭ-đăng 'long 'bâu phu, pơgang 'bâu phu, đak alôê. Tơmam 'bâu phu hloh kơ đĭ-đăng,

¹⁵ Ih thoi đak mơlĕch ro lăm pơgar, Ih boih sơlŭng đak tơdrong arih păng thoi lu đak glung ro đơ̆ng char Liban.

¹⁶ Ơ kial đơ̆ng yă-nơ̆m tơthu bĕ, ơ kial đơ̆ng gah gơal pơbơh bĕ! Tơthu bĕ lăm pơgar inh; wă kơ 'bâu phu đơ̆ng sư păr đông jơ̆p-jang!