Hơri Hiôk 3 - Sơ̆p Hlabơar Nơ̆r 'Bok Kei-Dei

Adruh

¹ Kơmăng inh 'bĭch kơpal giơng, Inh chơchă bơngai mă jơhngơ̆m inh hơyuh. Inh chă sư ră mă-lei ưh kơ 'bôh.

² Dang ei inh gô iung hloi năm chă, Bơngai mă inh hơyuh tơ rim kơ trong glung, Tơ lu trong tơklah pêng lăm pơlei tih. Inh chă sư ră mă-lei ưh kơ 'bôh.

³ Lu linh gak 'bôh inh, lu sư oei yak dăr tăp pơlei ei, lei inh apinh hloi, lu iĕm hăm 'bôh, Bơngai mă inh hơyuh ưh?

⁴ Lăp inh weh ataih đơ̆ng lu sư, Blư 'bôh hloi bơngai mă inh hơyuh. Inh thar rôp kuăr hloi, ưh pă achăng sư bơih, Chông ba sư dĭng truh tơ hnam mĕ inh. Mơ̆t lăm anih bơngai mă anăp kơ inh.

⁵ Ơ lu adruh pơlei Jêrusalem, inh apinh lu iĕm pơkă. Hăm anăn lu kơtŏng dah lu juei lăm bri, 'Nĕ hơtŭt 'bơm păng 'nĕ râu tơdrong, Hơyuh hơdơ̆r. Mưh tam mă trŏ kơ jơ.

Adruh

⁶ Bơngai bu lĕch đơ̆ng char glă to noh, Dơhmôl thoi jrăng 'nhui Bluh hơyuh 'bâu phu. Hăm tôm tơdrong 'bâu phu đơ̆ng kơ lu bơngai mơdro tĕch?

⁷ To, noh jơ̆ tang-dŏ Sôlômôn! Tăp dăr kơ tang-dŏ noh; đei tơdrâu-jĭt 'nu bơngai pran kơtang khŭl Isơrael.

⁸ Đĭ-đăng lu sư chĕp đao gưm ngăl. Păng hơgei juăt kơ tơblah. Rim 'nu lu sư kiĕo đao tơ kơiĕng, Wă kơ răng hli kơ hơyăt kơplah măng mu.

⁹ Pơtao Sôlômôn pơm kơ sư kơdih minh pôm tang-dŏ, Hăm 'long đơ̆ng char Liban.

¹⁰ Sư pơm jơ̆ng tang-dŏ noh hăm hu, Anih gơning rŏng păng maih, Anih hơ-oei gom păng che gôh găm. Tŏk-bŏk lăm noh sư lơ̆k hăm che đơ̆ng lu adruh Jêrusalem tanh hăm jơhngơ̆m hơyuh.

¹¹ Ơ lu adruh Siôn, năm lăng bĕ Pơtao Sôlômôn, Yơ̆l môk pơtao đêl mĕ sư pơyơ̆l kơ sư lăm năr pơkong kơ sư sơ̆, lăm năr mă jơhngơ̆m sư chơt hiôk.