Hơri Hiôk 2 - Sơ̆p Hlabơar Nơ̆r 'Bok Kei-Dei

¹ Inh thoi pơkao gôh tơ tơmăn Sarôn, Thoi pơkao kok jơk tơ lăm thŭng

Tơdăm

² Pơyô inh oei tŏk-bŏk lu bơngai adruh, Thoi pơkao kok jơk oei tŏk-bŏk tơm jơla.

Adruh

³ Bơngai mă inh hơyuh oei tŏk-bŏk lu tơdăm, Thoi tơm 'long hơra mi chăt tŏk-bŏk bri brah. Inh lăp đon tơpă wă pơdơh ngôi ala yơ̆p sư; Plei sư 'ngam bơngơi lăp kơ hơlŏng inh.

⁴ Sư chông ba inh tơ anih sŏng sa tih. Jơhngơ̆m hơyuh sư thoi hla klơ̆p kơpal inh.

⁵ Iŏk bĕ plei hơmu kro na pơlung jơhngơ̆m inh; Iŏk bĕ plei hơra mi tơgŭm wă kơ inh pran; Yua kơ inh đei jĭ đơ̆ng tơdrong hơyuh.

⁶ Ti gah 'ngiĕo sư hơgơn ala kơ̆l inh. Păng ti gah 'ma sư kuăr inh!

⁷ Ơ lu adruh Jêrusalem inh apinh lu iĕm pơkă, Hăm anăn lu kơtŏng dah lu juei lăm bri. 'Nĕ kơ hơtŭt 'bơm păng 'nĕ kơ râu tơdrong hơyuh hơđơ̆r mưh tam mă trŏ kơ jơ.

Bơngai adruh 'blŏk

⁸ Ei nơ̆r pơyô inh! To, sư truh boih. Sư pơplŏng kơ kông dơhrông kơ groi.

⁹ Bơngai mă inh hơyuh nhen thoi kơtŏng. Dah thoi juei dăm. To sư dơ̆ng tơ rŏng tơnăr hnam nhôn. Sư tơmang đơ̆ng 'măng-'mŏk, Sư gŏk lăng đơ̆ng 'măng hơdrao.

¹⁰ Pơyô inh pơma păng khan kơ inh!

Tơdăm Iung bĕ, ơ bơngai mă inh hơyuh, Bơngai 'lơ̆ng hơiă inh. Bĕ ba năm.

¹¹ Yua kơ bơyan tơngiĕt kư̆m đĭ hloh, Đơ̆ng noh bơyan 'mi hlôi.

¹² Pơkao lăm teh đĭ tơlang. Bơyan sem kơtơp asi, Bơyan hơri chơt hiôk truh bơih, Jơ̆p lăm tơring bơ̆n.

¹³ Plei hơra pah tai wă đum, Păng 'long hơmu tơlang pơkao pơphơ̆r 'bâu phu. Iung bĕ ơ bơngai mă inh hơyuh, Bơngai 'lơ̆ng hơiă inh. Bĕ ba năm.

¹⁴ Ơ sem kơtơp inh, tơ sơlam tơmo, Păng lăm hơgơp kông. Tơ'bôh bĕ kơ inh muh măt ih. Asong bĕ inh mơ̆ng nơ̆r ih, Yua kơ nơ̆r pơma ih hơbôn rơngơp. Muh măt ih 'lơ̆ng hơiă.

Adruh

¹⁵ Rôp bĕ lu mơja kơ ba. Lu kon mơja pơrăm pơgar hơmu, Yua kơ hơmu ba tŏk-bŏk wă pơkao.

¹⁶ Bơngai mă inh hơyuh jing tơmam inh bơih, Păng inh jing tơmam sư. Sư wei triu sư tơ lăm tŏk-bŏk pơgar pơkao kok jơk.

¹⁷ Dĭng 'brưch hơdah păng măng mu hiong đĭ. Ơ bơngai mă inh hơyuh, wih hơlơ̆k tơ âu bĕ, Thoi kơtŏng, Thoi juei dăm tơ kơpal kông groi. 'Blŏk kơ pơyô sư