Horiso 98 - Sơ̆p Hlabơar Nơ̆r 'Bok Kei-Dei

Kră Yang pơgơ̆r teh đak

¹ Hơri bĕ kơ Kră Yang minh 'bai hơri 'nao; Yua kơ Sư pơm boih tơdrong hlĭch chrơp. Ti 'ma păng kơkŏng ti 'lơ̆ng rơgoh Sư, ăn jei Sư boih.

² Kră Yang tơbăt boih tơdrong Sư dŏng pơklaih. Păng pơdah boih tơdrong tơpăt Sư 'bơ̆t anăp kon pơlei pơla.

³ Sư 'blŏk kơ tơdrong 'mêm mơnat păng tơdrong 'lơ̆ng tơpăt Sư hăm bơngai Isơrael; Đơ̆ng tôch kơ teh đak 'bôh boih tơdrong Kră Yang lu bơ̆n dŏng pơklaih.

⁴ Ơ đĭ-đăng teh đak, ôr chơt 'nă hal bĕ kơ Kră Yang. Hơri chơt hiôk bĕ păng hơri tơ'nguơ̆ bơnê kơkuh bĕ kơ sư,

⁵ Iŏk bĕ brŏ reh, hơri ư-ang kơ Kră Yang. Iŏk brŏ tĭng-nĭng hơri tơ'nguơ̆ ư-ang bĕ kơ Kră Yang;

⁶ Hăm tơgiĕp păng jơwa keng. Na hơri chơt hiôk 'bơ̆t anăp pơtao, Kră Yang;

⁷ Đak dơsĭ păng lu sem brem oei lăm noh. Kơpal teh đak hăm lu oei lăm teh đak ôr jreo bĕ.

⁸ Đak krong wang tap ti bĕ! Kông groi kư̆m wang hơri chơt hiôk bĕ 'bơ̆t anăp Kră Yang!

⁹ Yua kơ Sư truh wă sek tơlang kơ teh đak. Sư sek tơlang kơ teh đak hăm tơdrong tơpăt sư, tơpăt hơnơ̆ng. Sư sek tơlang kơ kon pơlei pơla.