Horiso 94 - Sơ̆p Hlabơar Nơ̆r 'Bok Kei-Dei

Krao apinh Kră Yang iung kơting tơgŭm kon pơlei pơla Sư

¹ Ơ Kră Yang, Ih boih Kră Yang 'Bok Kei-Dei, iung kơting. Ih boih Kră Yang 'Bok Kei-Dei iung kơting. Pơchrang bĕ tơdrong Ih hil mĭl.

² Iung bĕ, ơ Yŏng Sek Tơlang kơ teh đak. Pơm tơwih bĕ kơ lu bơngai pơang kiơ̆ trŏ thoi lu sư pơm.

³ Ơ Kră Yang! Lu bơngai pơm kơnê̆ dĭng truh dang yơ? Lu bơngai pơm kơnê̆ oei wă pơang dĭng dang yơ?

⁴ Lu sư pơma nơ̆r pơang ling-lang, lu bơngai pơm kơnê̆ tă kơ pơư kơdih ngăl.

⁵ Ơ Kră Yang, lu sư pơjuă pơđep kon pơlei Ih. Pơmat lu kon pơlei Ih.

⁶ Lu sư pơlôch bơngai drŏ-kăn adro; Lu bơngai tơmoi. Păng kư̆m pơlôch lu bơngai mơti.

⁷ Lu sư khan: “Kră Yang ưh kơ 'bôh ôh, Kră Yang 'Bok Kei-Dei adrĕch Jakôp kư̆m ưh kơ băt.”

⁸ Ơ lu bơngai bơlŭk lăm kon pơlei kơchăng bĕ; Ơ lu bơngai kơtul kơwao, dang yơ mă iĕm gơh hơgei?

⁹ Kră Yang tơ'ngla pơjing hla đon ưh kơtơ̆ng hă? Kră Yang Tơ'ngla pơjing măt ưh kơ 'bôh hă?

¹⁰ Kră Yang mă phak lu dêh char boih wă ưh kơ chrih hă? Sư boih Kră Yang bơtho ăn tơdrong hơgei kơ kon bơngai.

¹¹ Kră Yang băt tơdrong tơchĕng kon bơngai. Tă tơdrong kơ đei ngăl.

¹² Ơ Kră Yang, pŭn dêh kơ bơngai bu mă Ih đei bơtho pơhrăm, Păng bơtho ăn khôi juăt Ih kơ sư.

¹³ Wă ăn kơ sư pơdơh hiôk-hian đơ̆ng năr pơmat-tat. Dĭng mă sir sơlŭng jrŭ kơ lu bơngai pơm kơnê̆ noh keh đang.

¹⁴ Yua kơ Kră Yang ưh kơ đei achăng lê̆ kon pơlei Sư. Kŭm ưh kơ lê̆ ôh dôm lu bơngai jing kon pơlei pơla Sư,

¹⁵ Tơdrong sek tơlang tơpăt gô wih tơ lu bơngai 'lơ̆ng tơpăt Păng noh bơngai đei jơhngơ̆m 'lơ̆ng tơpăt gô rok kiơ̆.

¹⁶ Bu gô iung blah lu bơngai pơm kơnê̆ Ăn kơ inh? Bu gô dŏng inh pơm kơ lu bơngai pơm kơnê̆?

¹⁷ Dah Kră Yang ưh kơ đei dŏng tơgŭm inh, Lei bơhngol inh oei boih tơ lăm bơsat.

¹⁸ Ơ Kră Yang, mưh inh khan: “Jơ̆ng inh tơsĕr.” Na tơdrong 'mêm Ih dui tơiung inh hloi.

¹⁹ Mưh inh đei tơdrong rŭng răng. Na tơdrong Ih pơlung pơm ăn kơ jơhngơ̆m inh hiôk.

²⁰ Hăm gơh lu bơngai pơyơ̆r mă pơm kơnê̆ pơgơ̆p hăm Ih, yua khôi juăt wă pơrăm ih.

²¹ Lu sư pơđâu băl wă pơm kơnê̆ kơ lu bơngai tơpăt. Păng sek pơlôch lu bơngai ưh kơ đei yoch.

²² Mă-lei Kră Yang jing anih kơđông kơjăp pĕng inh. Kră Yang thoi Tơmo Tih, anih mă inh kơ'nơp.

²³ Kră Yang gô pơm tơwih yua kơ tơdrong yoch lu sư. Kră Yang gô pơlôch lu sư yua kơ tơdrong lu sư pơm kơnê̆; Kră Yang 'Bok Kei-Dei gô pơlôch pơrăm lu sư.