Horiso 93 - Sơ̆p Hlabơar Nơ̆r 'Bok Kei-Dei

Tơdrong krưp mơsêh Kră Yang

¹ Kră Yang pơgơ̆r; Sư hrŭk ư-ang rang mơnhal. Kră Yang hrŭk tơdrong ư-ang rang mơnhal păng tơ̆n tơdrong pran kơtang, tơpă pơjing teh đak kơjăp, ưh kơ đei pơpơ̆.

² Tang-dŏ pơtao Sư pơjing kơjăp đơ̆ng sơ̆. Sư đei adrol hloh kơ 'măng blŭng

³ Ơ Kră Yang, đak dơsĭ tŏk kơjung. Đak dơsĭ jơwa re dêh; Đak dơsĭ poh-yă tŏk kơjung jơwa grơ̆m grăm.

⁴ Kră Yang oei pơgơ̆r tơ kơpal đei tơdrong mơsêh. Mơsêh hloh kơ jơwa đak dơsĭ. Mơsêh hloh kơ lu jơwa đak dơsĭ poh-yă.

⁵ Ơ Kră Yang, dôm tơdrong Ih tơtă kơjăp sĭt; Hnam Ih 'lơ̆ng rơgoh tơpă truh tơ ning-mônh hloi.