Horiso 92 - Sơ̆p Hlabơar Nơ̆r 'Bok Kei-Dei

Hơri bơnê kơ Kră Yang

¹ 'Lơ̆ng dêh tơdrong kơkuh bơnê kơ Kră Yang, Păng hơri ư-ang kơ anăn Ih. Ơ Kră Yang Tih Hloh.

² Pơgê hrôih ră roi tơdrong Ih 'mêm mơnat, Kơmăng ră roi tơdrong 'lơ̆ng tơpăt Ih.

³ Lăm Brŏ mơjĭt dăng tơlei păng tĭng-nĭng. Reh tơmơ̆t hăm brŏ dung.

⁴ Ơ Kră Yang, Ih pơhiôk ăn kơ inh boih lăm tơdrong jang Ih; Inh gô hơri hiôk chơt kơ tơdrong jang đơ̆ng ti Ih pơm.

⁵ Ơ Kră Yang, tơdrong jang Ih tih tơpă. Tơdrong tơchĕng Ih jrŭ dêh.

⁶ Lu bơngai kơwao ưh kơ gơh băt, lu bơngai kơtul kư̆m ưh kơ gơh hlôh,

⁷ Mă khan lu bơngai pơm kơnê̆ chăt hrôh thoi 'nhĕt, Lu bơngai pơm kơnê̆ iung mơdrŏng, noh 'măn lê̆ kơ lu sư wă hiong răm ling-lang hlŏng hloi.

⁸ Mă-lei, ơ Kră Yang! Ih boih mă nhôn pơư ling-lang.

⁹ Yua kơ, ơ Kră Yang, to lu ayăt kơ Ih. Tơpă, lu ayăt kơ Ih gô hiong răm; Đĭ-đăng lu bơngai pơm kơnê̆ gô tơklah tơklang.

¹⁰ Mă-lei Ih ăn kơ hơke inh rai kơjung thoi rơmo bri. Ih tuh boih kơ inh hăm đak pơgang 'bâu phu 'nao.

¹¹ Măt inh 'bôh boih lu ayăt kơ inh hiong răm. Păng đon inh kơtơ̆ng boih lu ayăt kơ inh đĭ rŭng răng nhơ̆m hmoi.

¹² Bơngai tơpăt gô bluh thoi 'long gol păng gô rai kơjung thoi 'long hơngo tơ char Liban.

¹³ Đe pơtăm lu sư lăm hnam Kră Yang. Wơ̆ tih tơ lăm cham Kră Yang 'Bok Kei-Dei lu bơ̆n.

¹⁴ Mă khan truh tơ kră, lu sư oei đei pơkao plei. Sư jing păng hơdrih ling-lang,

¹⁵ Wă tơ'bôh kơ Kră Yang tơpăt; Sư jơ̆ tơmo pĕng inh lăm Sư ưh kơ đei đŏng đĕo.