Horiso 91 - Sơ̆p Hlabơar Nơ̆r 'Bok Kei-Dei

Kră Yang 'Bok Kei-Dei Tơ'ngla wei-lăng bơ̆n

¹ Bơngai bu oei lăm anih hlơp Kră Yang mă Tih Hloh. Gô oei lăm yơ̆p Tơ'ngla mơsêh mơyang.

² Inh gô khan gah Kră Yang: “Sư boih anih mă inh kơ'nơp păng kơđông kơjăp mă inh hơđơ̆ng. Sư boih Kră Yang 'Bok Kei-Dei mă inh gơnang.”

³ Sư gô pơklaih ih đơ̆ng hơđong kap sem. Păng đơ̆ng lôch hơbuh.

⁴ Sư gô pĕng bơwei ih hăm sŏk pơnăr sư. Ih gô kơ'nơp tơ ala pơnăr sư. Tơdrong tơpăt Sư jing khêl păng kơđông kơjăp pĕng ih.

⁵ Ih pă đei hli boih mă tơdrong hli krưp kơmăng, mă 'brơ̆m păr kơ'năr

⁶ Kŭm huay kơ hli tơdrong jĭ hơbuh truh lăm măng mu. Dah tơdrong đe pơlôch pơrăm kơplah 'năr dơ̆ng.

⁷ Gô đei rơbâu bơngai pơ̆k cheng ih păng hơngan bơngai pơ̆k lôch gah 'ma ih. Mă-lei tơdrong răm noh huay kơ truh tơ ih.

⁸ Ih lăp lăng 'bôh hăm măt đĕch. Păng gô 'bôh tơdrong pơm tơwih kơ lu bơngai pơm kơnê̆.

⁹ Ơ Kră Yang yua kơ Ih jing anih inh kơ'nơp. Ơ Kră Yang Tih Hloh Ih pơjing boih anih oei,

¹⁰ Thoi noh ưh kơ đei tơdrong răm kiơ mă truh kơ ih. Kŭm ưh kơ đei jĭ hơbuh kiơ mă truh tơ bơsŭn ih.

¹¹ Yua kơ sư gô ăn linh jang Sư, wei-lăng rim trong ih năm.

¹² Linh jang gô pôk ih lăm ti lu sư. Hli kơ jơ̆ng ih kơtơih 'bơm tơmo

¹³ Ih gô yak juă kơpal kơ̆l 'bih dong păng dăm-brang; Gah dăm-brang păng 'bih choh lôch ih juă bơhlơ̆r lê̆ tơ ala jơ̆ng.

¹⁴ Kră Yang khan: “Yua kơ ih 'mêm kơ Inh na Inh gô dŏng pơklaih ih; Yua kơ ih băt anăn Inh. Na Inh gô wei-lăng ih

¹⁵ Sư gô krao khan apinh Inh, Inh gô tơl tơwih kơ sư; Lăm năr pơmat-tat, Inh oei hơdai sư, dŏng pơklaih sư păng pôk pơư kơ sư.

¹⁶ Inh gô ăn kơ sư arih sot păng chơt hiôk păng gô tơ'bôh ăn kơ sư tơdrong Inh dŏng pơklaih.”