Horiso 90 - Sơ̆p Hlabơar Nơ̆r 'Bok Kei-Dei

SƠ̆P HLA BƠAR MĂ PUĂN Kră Yang 'Bok Kei-Dei oei oei ling-lang kon bơngai arih djal đĕch

¹ Ơ Kră Yang, Ih jơ̆ anih lu nhôn oei.a Lăm đĭ jơhnơr.

² Adrol kơ kông đak tam mă đei, teh hăm dêh char tam mă jing. Adrol kơ 'măng blŭng truh tơ ning-mônh Ih boih Kră Yang 'Bok Kei-Dei.

³ Ih ăn kơ kon bơngai wih brŏk tơ 'mui teh, Ih khan: “Ơ kon bơngai, brŏk bĕ tơ 'mui teh.”

⁴ Yua kơ minh-rơbâu sơnăm 'bơ̆t anăp Ih, thoi minh năr brei mă hloh boih, thoi minh măng kral.

⁵ Ih pơm kơ lu sư hoch kiơ̆ đak lơ̆p ro. Thoi kơ tep lôch. Lu sư thoi hla 'nhĕt chăt hơdrih pơgê hrôih.

⁶ Pơgê hrôih chăt bluh 'lơ̆ng. Kơsơ̆ sư jô kro.

⁷ Tơpă, lu nhôn lôch răm yua kơ tơdrong Ih hil mĭl. Lu nhôn hli tơrơ yua kơ Ih hil mĭl.

⁸ Ih dan boih tơdrong kơnê̆ lu nhôn 'bơ̆t anăp Ih, păng pơdah dôm tơdrong yoch hlơp lu nhôn. Lăm hơdah 'bơ̆t anăp Ih

⁹ Đơ̆ng ih hil, na măng năr lu nhôn hiong tôch đĭ. Sơnăm lu nhôn arih tôch thoi nơ̆r tơhôih dui jơhngơ̆m.

¹⁰ Sơnăm lu nhôn arih kư̆m lăp truh tơpơh-jĭt. Dah đei pran 'biơ̆ truh tơ tơhngam-jĭt. Mă-lei tơdrong pơang lu sư, jơ̆ lăp pơmat-tat păng ơh sơ'ngon. Yua kơ tơdrong arih lu nhôn 'bônh kơ tôch, đơ̆ng noh lu nhôn păr hiong.

¹¹ Bu băt tơdrong kơtang mă Kră Yang hil? Bu kĕ băt tơdrong Ih hil mĭl, sư gô jing thoi yơ?

¹² Apinh Ih bơtho lu nhôn băt kơ jô̆ khei năr lu nhôn arih. Wă kơ lu nhôn đei jơhngơ̆m đon hơgei,

¹³ Ơ Kră Yang! Apinh Ih hơlơ̆k dơ̆ng. Ih wă hil dĭng dang yơ? Tơplih jơhngơ̆m Ih mơnat kơ đĭch đam Ih

¹⁴ Ơ! Apinh Ih ăn kơ lu nhôn rim pơgê hrăp jơhngơ̆m kơ tơdrong Ih 'mêm. Wă kơ đĭ lăm chăl arih lu nhôn chơt hiôk hơri bơnê.

¹⁵ Apinh Ih ăn kơ lu nhôn đei jơhngơ̆m chơt hiôk hơtŏ hơnơ̆ng kiơ̆ kơ năr mă Ih đei ăn kơ nhôn pơmat, Păng hơtŏ hơnơ̆ng kiơ̆ kơ sơnăm mă lu nhôn đei tơdrong hơnat hơnot

¹⁶ Apinh Ih tơ'bôh ăn kơ lu đĭch đam Ih tơdrong jang Ih. Păng tơdrong mơsêh ư-ang Ih pơchrang tơ kon sâu lu sư.

¹⁷ Apinh tơdrong mơnat đơ̆ng Kră Yang 'Bok Kei-Dei lu nhôn, oei hơdai lu nhôn; Apinh Ih pơm ăn mă kơjăp dôm tơdrong jang đơ̆ng ti lu nhôn. Tơpă, apinh Ih pơm ăn mă kơjăp tơdrong jang đơ̆ng ti lu nhôn pơm.