Horiso 9 - Sơ̆p Hlabơar Nơ̆r 'Bok Kei-Dei

Hơri bơnê kơ tơdrong tơpăt Kră Yang 'Bok Kei-Dei

¹ Inh gô bơnê kơ Ih. Ơ Kră Yang, hăm đĭ jơhngơ̆m, Inh gô ră roi dôm tơdrong jang hlĭch chrơp Ih,

² Ơ Kră Yang Tih Hloh, inh gô chơt 'nă hal lăm Ih, păng hơri bơnê kơ Anăn Ih

³ Lu bơngai ayăt kơ inh kơdŭn tơ rŏng, lu sư gô pơ̆k hiong răm, 'bơ̆t anăp Ih,

⁴ Yua kơ Ih wei dŏng păng ăn kơ inh gơh jei; Ih oei tơ kơpal tang-dŏ pơtao sek tơlang tơpăt.

⁵ Kră Yang, Ih hil chrih boih rim teh đak pơrăm boih lu bơngai kơnê̆, Ih sut lê̆ boih dôm anăn lu sư ling-lang hlŏng hloi.

⁶ Lu ayăt tôch đĭ boih, hiong răm đĭ ling-lang hlŏng hloi Ih pơrăm lê̆ boih pơlei lu sư, Ưh pă đei bu 'blŏk kơ lu sư dơ̆ng.

⁷ Mă-lei Kră Yang pơtao pơgơ̆r ling-lang; Kră Yang sư hơmet boih tang-dŏ pơtao Sư wă sek tơlang

⁸ Sư gô sek tơlang kơ teh đak hăm tơdrong tơpăt, Sư pơgơ̆r tơpăt na sek tơlang kon bơngai hăm tơdrong trŏ.

⁹ Kră Yang jơ̆ anih kơ'nơp tih kơ bu mă đe pơjuă pơđep. Minh anih kơ'nơp tih lăm năr đei gleh truh

¹⁰ Bơngai bu băt anăn Ih gô gơnang kơ Ih; Yua kơ Ih ưh kơ achăng lê̆ ôh, bơngai bu chơchă Ih.

¹¹ Hơri bơnê bĕ kơ Kră Yang, Tơ'ngla oei lăm pơlei Siôn; Roi tơbăt kơ kon pơlei pơla tơdrong tih Sư pơm

¹² Yua kơ Tơ'ngla iung kơting pham 'blŏk kơ lu bơngai mă pơmat-tat. Sư ưh kơ đei hiơt ôh tơdrong lu sư nhơ̆m ôr.

¹³ Kră Yang ơi, mơnat bĕ kơ inh, Lăng bĕ tơdrong pơmat-tat đơ̆ng lu bơngai areh kơ inh, pơm kơ inh. Ơ Kră Yang mă pôk hơtŏk inh hlôi kơ 'măng jang tơdrong lôch Lăng bĕ tơdrong pơmat-tat inh, Mă đơ̆ng đe areh kơ inh

¹⁴ Tơ 'măng jang kon hơdruh Siôn. Inh ră roi đĭ dôm tơdrong 'mêm bơnê kơ Ih, Păng gô chơt hiôk lăm tơdrong Ih dŏng pơklaih

¹⁵ Lu kon pơlei pơla huŏng boih lăm sơlŭng đơ̆ng lu sư sir; Jơ̆ng lu sư đom boih lăm hơnhuăl đêl lu sư dăng

¹⁶ Kră Yang pơdah boih Sư kơdih; đơ̆ng sek tơlang tơpăt; lu bơngai pơm kơnê̆, 'leh boih lăm hơnhuăl đơ̆ng ti lu sư dăng kơdih. Higaiôn Sêla

¹⁷ Lu bơngai pơm kơnê̆ gô huŏng tơ pơlei lu lôch, Păng đĭ lu bơngai mă hiơt kơ Kră Yang 'Bok Kei-Dei.

¹⁸ Lu bơngai pơmat-tat đe ưh kơ đei hiơt ling-lang ôh, Păng lu bơngai răm-'băm kư̆m ưh kơ hiong tơdrong hơmĕng ling-lang mơ̆n

¹⁹ Ơ Kră Yang iung bĕ. 'Nĕ ăn jei kon bơngai ôh, Sek tơlang bĕ kơ đĭ kon bơngai 'bơ̆t anăp Ih

²⁰ Ơ Kră Yang, pơm bĕ kơ lu sư hli, Ăn kơ kon bơngai băt, sư jing bơngai hmă đĕch. Sêla