Horiso 87 - Sơ̆p Hlabơar Nơ̆r 'Bok Kei-Dei

Tơdrong 'lơ̆ng rŏ pơlei Siôn

¹ Sư man boih hơnă tơ kơpal kông 'lơ̆ng rơgoh.

² Kră Yang 'mêm kơ lu 'măng jang pơlei Siôn, Hloh kơ lu anih nai mă adrĕch Jakôp oei,

³ Ơ pơlei Kră Yang 'Bok Kei-Dei, đe roi boih tơdrong ư-ang kơ ih. Sêla

⁴ “Inh gô roi gah Êyiptơ păng Babilôn lu bơngai char mă băt kơ inh. To Philistin, Tirơ păng Êthiôpi; Lu bơngai âu tơpŭ tơ Siôn.”

⁵ Đe gô roi gah Siôn thoi âu: “Lu đe âu đe noh tơpŭ boih Siôn noh; Kră Yang Tih Hloh gô pơm kơ Siôn kơjăp.”

⁶ Kră Yang gô chih anăn lu kon pơlei lăm sơ̆p hla bơar na Sư gô jô̆: “Âu đe tơpŭ kơ sư tơ Siôn.” Sêla

⁷ Lu bơngai hat hơri păng lu đe suang gô khan thoi âu: “Đĭ-đăng tơm tơdrong arih inh oei lăm Ih.”