Horiso 86 - Sơ̆p Hlabơar Nơ̆r 'Bok Kei-Dei

Krao khan apinh Kră Yang 'Bok Kei-Dei tơgŭm

¹ Ơ Kră Yang, apinh Ih pơgling đon mơ̆ng păng tơl tơwih kơ inh, Yua kơ inh pơmat-tat păng dơnuh hin.

² Apinh Ih wei-lăng bơhngol inh, yua kơ inh tơnăp; Ih Kră Yang 'Bok Kei-Dei inh! Apinh dŏng pơklaih đĭch đam Ih mă oei gơnang kơ Ih.

³ Ơ Kră Yang! Apinh Ih mơnat kơ inh, yua kơ prăt năr inh krao apinh Ih.

⁴ Apinh ăn bĕ kơ bơhngol lu đĭch đam Ih chơt hiôk. Yua kơ, ơ Kră Yang, bơhngol inh gơnang hơmĕng kơ Ih.

⁵ Ơ Kră Yang! Ih 'lơ̆ng tơpăt băt mơnat ăn. Ih 'bĕnh kơ 'mêm mơnat rơkah rơkai kơ đĭ-đăng lu bơngai mă krao chă Ih.

⁶ Ơ Kră Yang, pơgling đon Ih mơ̆ng bĕ nơ̆r inh krao khan. Mơ̆ng nơ̆r inh ôr krao apinh.

⁷ Lăm năr pơmat-tat inh gô krao chă Ih; na Ih gô tơl tơwih; nơ̆r inh.

⁸ Ơ Kră Yang, lăm lu yang ưh kơ đei bu thoi Ih; Dôm tơdrong jang lu sư kư̆m ưh kơ đei thoi tơdrong jang Ih.

⁹ Đĭ-đăng lu teh đak mă Ih pơjing, gô năm kơkuh 'bơ̆t anăp Ih, ơ Kră Yang Păng hơri ư-ang kơ anăn Ih.

¹⁰ Ih Kră Yang mơsêh, pơm tôm tơdrong hlĭch chrơp; Lăp minh 'nu Ih đĕch Kră Yang 'Bok Kei-Dei.

¹¹ Ơ Kră Yang, apinh Ih bơtho tơ'bôh kơ inh trong Ih. Na inh gô yak kiơ̆ tơdrong 'lơ̆ng tơpăt Ih; Apinh Ih ăn kơ inh đei jơhngơ̆m băt hli yom kơ Ih,

¹² Ơ Kră Yang 'Bok Kei-Dei inh. Inh kơkuh bơnê kơ Ih hăm đĭ jơhngơ̆m. Inh gô ư-ang anăn Ih ling-lang.

¹³ Yua kơ tơdrong Ih 'mêm kơ inh tih tơpă. Ih dŏng pơklaih inh đơ̆ng jrŭ lăm dêh atâu.

¹⁴ Ơ Kră Yang 'Bok Kei-Dei, lu bơngai pơang iung pơrăm inh. Khŭl bơngai kơnê̆ chă wă pơlôch inh, Lu sư ưh pă lăng Ih boih.

¹⁵ Mă-lei, ơ Kră Yang! Ih boih Kră Yang 'Bok Kei-Dei mă 'mêm băt mơnat. Hiơ̆ kơ hil, 'bĕnh kơ tơdrong 'mêm păng tơdrong tơpăt sĭt.

¹⁶ Ôi! Apinh Kră Yang lăng inh păng mơnat kơ inh. Apinh Ih ăn tơdrong pran kơtang kơ lu đĭch đam Ih. Apinh pơklaih kon drŏ-nglo đam drŏ-kăn Ih.

¹⁷ Apinh Ih tơ'bôh ăn tơdra tơdrong Ih mơnat kơ inh, wă kơ lu bơngai areh kơ inh gơh 'bôh păng mơlâu, ơ Kră Yang! Ih boih mă tơgŭm păng pơlung inh.