Horiso 81 - Sơ̆p Hlabơar Nơ̆r 'Bok Kei-Dei

Chu kiơ̆ nơ̆r Kră Yang

¹ Hơri chơt hiôk bĕ kơ Kră Yang 'Bok Kei-Dei jơ̆ tơdrong pran kơtang lu bơ̆n; Athei ôr chơt hiôk bĕ kơ Kră Yang 'Bok Kei-Dei Jakôp.

² Pơre bĕ tơ'nguơ̆ hơri păng teh hơgơ̆r iĕ, reh bĕ brŏ dung tơmơ̆t păng tĭng-nĭng.

³ Hlôm bĕ tơgiĕp kơplah khei tơ'bang kơplah khei pơnil, tơbăt kơ lu năr giĕng tih lu bơ̆n.

⁴ Noh minh tơdrong juăt kơ Isơrael, Minh tơdrong tơtă đơ̆ng Kră Yang 'Bok Kei-Dei Jakôp.

⁵ Sư pơjing tơdrong noh tơ'bôh ăn kơ adrĕch Jôsep. Kơplah Kră Yang blah dêh char Êyiptơ, anih inh kơtơ̆ng nơ̆r mă-lei ưh kơ hlôh.

⁶ “Inh hơleh boih tung trăp đơ̆ng hơngiĕng lu iĕm; ti lu iĕm tơplôch boih đơ̆ng chĕp bai.

⁷ Lăm năr anat anot iĕm krao apinh, Inh dŏng pơklaih iĕm. Inh tơl tơwih kơ iĕm đơ̆ng anih hlơp lăm grơ̆m glaih, Păng pơlong lăng ih 'bơ̆t tu đak Mêri 'ba. Sêla

⁸ Ơ kon pơlei Inh, mơ̆ng bĕ nơ̆r Inh mưh inh tơbăt kơ iĕm. Ơ Isơrael, rŏ kơ iĕm oei mơ̆ng Inh!

⁹ Lăm lu iĕm, 'nĕ kơ đei yang nai dơ̆ng; Kŭm 'nĕ chă kơkuh kơ yang lu bơngai tơmoi.

¹⁰ Inh boih Kră Yang, 'Bok Kei-Dei iĕm, Inh Tơ'ngla dŏng pơklaih iĕm đơ̆ng dêh Êyiptơ. Ha bĕ 'bơ̆r iĕm mă să, Inh gô tah 'bĕnh.

¹¹ Mă-lei kon pơlei Inh ưh kơ mơ̆ng nơ̆r Inh. Isơrael ưh kơ wă chu yom kơ Inh.

¹² Thoi noh, Inh achăng lê̆ lu sư pơm kiơ̆ kơ jơhngơ̆m arăng kơ chu lu sư. Kiơ̆ kơ tơdrong lu sư chă đon kơdih.

¹³ Ơ! Rŏ kơ lu kon pơlei Inh oei mơ̆ng Inh. Rŏ kơ Isơrael chu yak kiơ̆ trong Inh!

¹⁴ Lei ưh kơ đunh ôh Inh gô pơrăm lu bơngai ayăt kơ sư. Hiŏng ti Inh pơm tơwih kơ lu bơngai pơm kơnê̆ kơ lu sư.

¹⁵ Lu bơngai mă hil areh kơ Kră Yang gô chu yom kơ Sư. Tơdrong chu lui kơ Sư oei oei ling-lang.

¹⁶ Mă-lei Inh gô iŏk phe 'ba mi mă 'lơ̆ng hloh 'me rong lu sư. Păng ăn kơ lu sư phĭ jơnap, hăm đak sut bri đơ̆ng lăm tơmo.”