Horiso 8 - Sơ̆p Hlabơar Nơ̆r 'Bok Kei-Dei

Tơdrong ư-ang Kră Yang păng tơdrong kon bơngai 'lơ̆ng rŏ

¹ Ơ Kră Yang, Ih boih Kră Yang lu nhôn, Anăn Ih 'lơ̆ng rŏ jơ̆p kơ lăm teh đak; Tơdrong ư-ang rang mơnhal Ih jơ̆p tơ kơpal plĕnh!

² Đơ̆ng 'bơ̆r lu hơ'lơ̆p iĕ lu oei mŏm, Ih pơjing pơlei kơjăp, yua kơ lu ayăt. Wă pơm kơ lu bơngai ayăt păng lu iung kơting jing hreh.

³ Dah inh lăng tơ plĕnh đơ̆ng lu hơnglâu ti Ih pơjing Măt khei păng lu sơnglŏng mă Ih đei pơjing boih.

⁴ Kon bơngai noh kiơ na Ih mah tơchĕng 'blŏk? Kon bơngai noh kiơ, na Ih mah wei wêr sư.

⁵ Kră Yang pơjing kon bơngai hơtuch 'biơ̆ kơ Ih,a pơyơ̆l ăn kơ lu sư tơdrong ư-ang păng đei pơyom.

⁶ Ih jao ăn kơ kon bơngai pơgơ̆r wei-lăng dôm tơmam đơ̆ng tơpang ti Ih pơjing, ăn kơ lu kon sem, tơmam chu đep tơ ala jơ̆ng kon bơngai.

⁷ Đĭ lu triu, rơmo, hăm lu sem bri.

⁸ Đĭ kơ lu sem păr tơ plĕnh hăm đĭ lu ka glơi tơ lăm trong đak dơsĭ sŭng.

⁹ Ơ Kră Yang, Kră Yang lu nhôn, anăn Ih jing ư-ang jơ̆p-jang tơ ala teh đak.