Horiso 79 - Sơ̆p Hlabơar Nơ̆r 'Bok Kei-Dei

Krao khan kơ pơlei Jêrusalem păng kon pơlei Isơrael

¹ Ơ Kră Yang 'Bok Kei-Dei, lu bơngai tơmoi blah iŏk boih teh đak Ih. Pơm mơgrĭ kơ hnam akŭm Ih păng pơm kơ Jêrusalem hĕch hoch đĭ.

² Lu sư klơ̆m lê̆ akâu lôch lu đĭch đam Ih, Ăn kơ lu sem păr sa, ăn kơ lu sem bri sa lu bơngai 'lơ̆ng rơgoh Ih.

³ Lu sư pơlôch pham lĕch thoi đak ro tăp dăr kơ pơlei Jêrusalem. Ưh kơ đei bu 'bŭ akâu bơngai lôch.

⁴ Lu nhôn jing bơngai pơm pơhiĕk ăn kơ rông 'bôt. Jing bơngai lu dêh char tăp dăr đe che bơle păng pơjăm.

⁵ Ơ Kră Yang! Dĭng truh dang yơ? Ih wă hil khŏm khŏm hloi ah? Ih wă hil gar oei sa thoi ŭnh ah?

⁶ Tuh bĕ tơdrong Ih hil kơ lu teh đak mă ưh kơ băt kơ Ih. Păng tơ lu teh đak mă ưh kơ đei krao apinh hăm anăn Ih

⁷ Yua kơ lu sư luăn sa boih adrĕch Jakôp, păng pơrăm tơhiong boih teh tơring sư oei.

⁸ Apinh Ih 'nĕ pă 'blŏk, 'nĕ pă jô̆ dôm tơdrong yoch kơnê̆ lu yă 'bok nhôn sơ̆; Apinh tơdrong 'mêm mơnat Ih tĕnh tĕnh tơgŭm lu nhôn, yua kơ lu nhôn pơmat dêh boih.

⁹ Ơ Kră Yang 'Bok Kei-Dei Tơ'ngla dŏng pơklaih nhôn, yua kơ wă ư-ang anăn Ih apinh Ih tơgŭm nhôn. Yua kơ anăn Ih, apinh Ih dŏng pơklaih lu nhôn, păng mơnat ăn kơ tơdrong yoch lu nhôn.

¹⁰ Yua kơ kiơ lu teh đak pơ̆n khan: “Kră Yang 'Bok Kei-Dei lu sư tơ yơ?” 'Bơ̆t anăp lu nhôn ăn kơ kon bơngai băt iung kơting kơ lu đĭch đam Ih, mă đe pơlôch boih.

¹¹ Ăn kơ tơdrong lu bơngai bơnă krao ôr tơtok truh tơ Ih; Kiơ̆ kơ tơdrong mơsêh tih Ih apinh Ih tơgŭm pơklaih bĕ lu bơngai mă đe wă pơlôch.

¹² Pơm tơwih bĕ tơpơh wơ̆t tơ lăm jơhngơ̆m lu teh đak tăp dăr kơ nhôn. Kơ, nơ̆r pơjăm pơjuă mă lu sư pơjăm boih Ih ơ Kră Yang.

¹³ Gah lu nhôn jing kon pơlei pơla Ih păng jing triu lăm tơmăn 'nhĕt Ih. Lu nhôn gô bơnê kơkuh kơ Ih ling-lang. Lu nhôn gô hơri bơnê kơ Ih ling-lang hlŏng hloi.