Horiso 78 - Sơ̆p Hlabơar Nơ̆r 'Bok Kei-Dei

Kră Yang 'Bok Kei-Dei chông ba lu kon pơlei pơla Sư

¹ Ơ kon pơlei pơla Inh, pơgling đon mơ̆ng bĕ nơ̆r Inh bơtho. Pơgrê đon mơ̆ng bĕ đơ̆ng 'bơ̆r inh pơma.

² Inh gô pơih 'bơ̆r Inh pơma pơđơ̆k, tơblang nơ̆r pơpơn sơ̆ ki,

³ Tơdrong mă lu bơ̆n đei kơtơ̆ng boih păng băt boih. Đe 'bok bơ̆n đei roi ăn kơ lu bơ̆n boih.

⁴ Lu bơ̆n kư̆m ưh kơ ôn dôm tơdrong noh kơ kon sâu lu bơ̆n. Bơ̆n gô roi kơ adrĕch adrung đơ̆ng rŏng dôm tơdrong trŏ hơri bơnê kơ Kră Yang, Tơdrong mơsêh păng tơdrong jang hlĭch chrơp mă Kră Yang đei pơm.

⁵ Sư đei ăn boih nơ̆r tơtă? Jakôp. Sư ăn lê̆ khôi juăt lăm Isơrael. Noh sư pơkă boih kơ 'bok bơ̆n wă kơ bơtho khôi juăt kơ lu kon sâu sư.

⁶ Wă kơ adrĕch adrung đơ̆ng rŏng băt kơ khôi juăt Sư. Lu kon sâu tơpŭ đơ̆ng rŏng dơ̆ng gơh băt kơ dôm khôi juăt noh. Na đơ̆ng noh lu sư bơtho dơ̆ng kơ lu kon sâu sư.

⁷ Wă kơ lu sư đei jơhngơ̆m băt gơnang kơ Kră Yang 'Bok Kei-Dei. Wă huay kơ hiơt kơ dôm tơdrong Kră Yang đei pơm. Păng wei răk dôm nơ̆r Sư tơtă.

⁸ Wă kơ lu sư huay kơ rok lu 'bok sư. Jơ̆ minh adrĕch kơchu păng arăng kơ̆l, Ưh kơ đei jơhngơ̆m tơpăt păng ưh kơ đei đon lui kơjăp kơ Kră Yang 'Bok Kei-Dei.

⁹ Bơngai Êphraim chĕp hră păng 'brơ̆m, mă-lei kơdŭn tơ rŏng lăm năr tơblah,

¹⁰ Lu sư ưh kơ wei răk nơ̆r pơgơ̆p hăm Kră Yang 'Bok Kei-Dei, Hơngah ưh kơ chu arih kiơ̆ khôi juăt Sư.

¹¹ Hiơt đĭ dôm tơdrong jang Kră Yang mă đei pơm. Păng tơdrong hlĭch chrơp mă Kră Yang đei tơ'bôh ăn kơ lu sư.

¹² Kră Yang đei pơm boih dôm tơdrong hlĭch chrơp 'bơ̆t anăp 'bok lu sư. Tơ lăm char Êyiptơ, lăm anih thŭng dơnă Sôan.

¹³ Kră Yang blă lê̆ đak dơsĭ ăn kơ lu sư tŏk rok, Pơm ăn kơ đak dơ̆ng minh 'bôt tơbơ̆ng thoi dur.

¹⁴ Sư chông ba lu sư kơ'năr hăm hơmơ̆l, kơmăng hăm hơdah ŭnh.

¹⁵ Sư blah tơmo lăm char 'blach, ăn kơ lu sư đak nhă hrăp thoi đơ̆ng tu đak jrŭ,

¹⁶ sư ăn đak lĕch đơ̆ng tơmo ro thoi đak krong.

¹⁷ Mă-lei lu sư kư̆m oei pơm yoch păng Kră Yang. Hil plơ̆ kơ Kră Yang Tih Hloh tơ lăm char 'blach.

¹⁸ Lu sư pơrơ̆ng pơlong lăng Kră Yang 'Bok Kei-Dei, Na apinh tơmam sa kiơ̆ thoi lu sư wă.

¹⁹ Sư pơma kơnê̆ Kră Yang 'Bok Kei-Dei khan: “Kră Yang 'Bok Kei-Dei hăm gơh ưh hơmet gơ'bang sŏng sa tơ char 'blach?

²⁰ To sư teh tơmo, đak bluh lĕch ro hloi, 'bĕnh kơ thong. Mă-lei bĕ tơmam sa Sư ưh kơ gơh ăn kơ bơ̆n hă? Bĕ 'nhĕm kông sư ưh kơ gơh ăn kơ kon pơlei Sư hă?”

²¹ Wă kơ Kră Yang kơtơ̆ng na Sư hil dêh; ŭnh Sư hil soh sa Jakôp. Sư kư̆m hil kơ Isơrael.

²² Yua kơ lu sư ưh kơ wă lui kơ Kră Yang 'Bok Kei-Dei; Kŭm ưh kơ wă gơnang kơ tơdrong dŏng pơklaih đơ̆ng Sư.

²³ Mă-lei ră, Sư kư̆m athei lu tăl plĕnh tơ kơpal ti, Păng Sư pơih 'măng plĕnh,

²⁴ Tơjruh 'mi mana ăn kơ lu sư sa, ăn 'ba đơ̆ng plĕnh,

²⁵ Kon bơngai sa boih 'bĕng lu linh jang 'lơ̆ng. Sư gơih ăn tơmam sa phĭ mah,

²⁶ Sư ăn tơ plĕnh ti đei kial tơthu đơ̆ng gah hơlĕch. Đơ̆ng tơdrong mơsêh Sư ba ăn kial đơ̆ng gah gơal.

²⁷ Sư pơm 'mi 'nhĕm jruh tơ lu sư thoi 'mui teh. Ăn lu sem păr lơ thoi chuơh cheng dơsĭ.

²⁸ Sư ăn lu sem noh jruh tơ anih lu sư. Tăp dăr bơsŭn lu sư oei.

²⁹ Na lu sư sa, phĭ hrăp dĭng bơ̆l. Sư ăn tơmam kiơ̆ kơ lu sư hơpơi

³⁰ Mă-lei adrol kơ lu sư bơ̆l sa tơmam mă lu sư 'maih sa kơplah noh tơmam sa oei oei lăm 'bơ̆r lu sư.

³¹ Đei hloi Kră Yang 'Bok Kei-Dei hil kơ lu sư, pơlôch lu bơngai mă pran hloh lăm lu sư, Sư pơrăm lu kon tơdăm Isơrael.

³² Mă khan thoi noh ră, lu sư kư̆m oei pơm yoch. Oei ưh kơ lui kơ tơdrong hlĭch chrơp Kră Yang đei pơm.

³³ Thoi noh Sư pơm kơ 'năr lu sư hiong đĭ ưh kơ yua. Pơm kơ khei sơnăm lu sư hiong tôch lăm tơdrong hli krưp.

³⁴ Kơplah Kră Yang pơlôch lu sư, lu sư krao apinh Kră Yang. Tơbral chơchă krao apinh Kră Yang 'Bok Kei-Dei.

³⁵ Lu sư 'blŏk kơ Kră Yang 'Bok Kei-Dei jơ̆ tơmo tih lu sư. Kră Yang 'Bok Kei-Dei Tih Hloh jơ̆ Kră Yang dŏng pơklaih lu sư.

³⁶ Mă-lei lu sư chă pơma 'bơ̆r đĕch hăm Kră Yang. Yua hơpiĕt lu sư pơma hơlĕnh kơ Sư.

³⁷ Jơhngơ̆m lu sư ưh kơjăp păng Kră Yang. Lu sư kư̆m ưh kơ tơpăt lăm tơdrong pơgơ̆p Kră Yang 'Bok Kei-Dei tơtă.

³⁸ Mă-lei yua kơ tơdrong 'mêm mơnat Sư huay kơ jô̆ yoch, ưh kơ wă pơrăm lu sư; Lơ wơ̆t sư gơ̆t lê̆ kơ hil, Sư ưh kơ mah tơ'bôh dêh tơdrong Sư hil.

³⁹ Kră Yang 'blŏk kơ lu sư jơ̆ bơngai hmă đĕch. Thoi hơyuh kial lĕch boih pă wih dơ̆ng,

⁴⁰ Băt đei hơdôm wơ̆t lu sư pơm kơnê̆ hăm Kră Yang tơ char 'blach, păng pơm ăn kơ Sư sơ'ngon tơ teh dơnă!

⁴¹ Lu sư lơ wơ̆t pơlong lăng Kră Yang 'Bok Kei-Dei, Pơjah păng Kră Yang 'lơ̆ng rơgoh lu bơngai Isơrael.

⁴² Lu sư ưh kơ 'blŏk tơdrong mơsêh Kră Yang, lăm năr Kră Yang pơklaih lu sư;

⁴³ Sư ăn boih tơdra hlĭch chrơp tơ char Êyiptơ, Lu tơdrong mơsêh Sư lăm thŭng dơnă Sôar;

⁴⁴ Tơplih lu đak krong Êyiptơ jing pham lei lu sư pă gơh nhă dơ̆ng đơ̆ng tu đak.

⁴⁵ Sư ăn khŭl roi vŏng kăp lu sư; păng kit pơrăm lu sư;

⁴⁶ Ăn kơ lep tung-nut sa lu 'ba hơ'bo lu sư. Jao kơ lep 'ba sa plei 'long lu sư.

⁴⁷ Sư pơrăm pơgar hơmu lu sư păng 'mi prĕl, pơrăm 'long hơra lu sư hăm đak prĕl gom.

⁴⁸ Sư pơrăm sem dơrong lu sư hăm 'mi prĕl. Păng khŭl triu lu sư ăn kơ grơ̆m glaih.

⁴⁹ Sư tuh tơdrong hil, tơdrong hil mĭl dêh. Tơdrong hil mĭl păng pơmat-tat. Wơh minh khŭl linh jang chă pơrăm.

⁵⁰ Sư pơih trong kơ tơdrong hil Sư. Ưh pă ăn kơ bơhngol lu sư klaih kơ lôch. Na jao ăn tơdrong arih lu sư lôch kơ jĭ hơpoh;

⁵¹ Sư pơlôch đĭ lu kon kơdră lăm char Êyiptơ, Wă khan lu pran kơtang tơpŭ blŭng-a lăm kơđông bơsŭn Cham.

⁵² Mă-lei sư chông ba kon pơlei Sư lĕch thoi triu, Chông ba lu sư thoi khŭl triu rok char glă.

⁵³ Sư chông anhăk lu sư hiôk rơnŭk. Ưh pă đei hli kơ kiơ; Mă-lei đak dơsĭ kơlơ̆p lê̆, lu bơngai ayăt kơ lu sư.

⁵⁴ Sư anhăk ba lu sư truh tơ anih teh 'lơ̆ng rơgoh Sư, Truh tơ tơring groi mă ti 'ma Sư đei blah iŏk.

⁵⁵ Sư puh tơweh lu kon pơlei nai 'bơ̆t anăp lu sư, Hlang păng klah song teh ăn kơ lu sư jang sa. Sư ăn kơ lu bơngai Isơrael oei tơ lăm anih hnam kon pơlei ei.

⁵⁶ Mă-lei, lu sư pơlong lăng pơjăng pơjah hăm Kră Yang 'Bok Kei-Dei Tih Hloh, Ưh kơ chu kiơ̆ tơdrong juăt Kră Yang;

⁵⁷ Lu sư plơ̆ pơm kơnê̆ thoi 'bok yă lu sư sơ̆. Lu sư weh thoi 'brơ̆m hră đŏng.

⁵⁸ Đơ̆ng anih kơjung lu sư pơm kơ Kră Yang blĕk; Pơm ăn kơ Sư hil ơha yua kơ rup yang,

⁵⁹ wă Kră Yang 'Bok Kei-Dei kơtơ̆ng tơdrong noh, Sư blĕk tơpă; Sư hil achăng lê̆ lu bơngai Isơrael hloi;

⁶⁰ Sư weh lê̆ đơ̆ng anih akŭm Sư tơ Silô, Anih mă Sư oei hăm kon bơngai;

⁶¹ Sư jao hom pơgơ̆p Sư đe păng jao tơdrong ư-ang Sư lăm ti lu bơngai ayăt.

⁶² Sư jao kon pơlei Sư, ăn kơ đe pơlôch hăm đao hơlă. Sư blĕk dêh kơ kon pơlei pơla Sư.

⁶³ Ŭnh sa lu kon tơdăm lu sư. Păng kon adruh lu sư ưh pă đei bu iŏk oei.

⁶⁴ Lu 'bok soi sư pơ̆k lôch yua kơ đao hơlă, mă-lei lu drŏ-kăn adro pă đei hmoi.

⁶⁵ Đơ̆ng noh Kră Yang hơdơ̆r thoi iung đơ̆ng tep. Thoi bơngai nuih pran jreo tơkĕch đơ̆ng tơdrô pơm.

⁶⁶ Sư blah drŭt lu ayăt kơdŭn tơ rŏng, ăn kơ lu ayăt mơlâu ling-lang hloi.

⁶⁷ Sư lê̆ Hnam Jôsep, Ưh pă rơih iŏk adrĕch adrung Êphraim.

⁶⁸ Mă-lei sư rơih iŏk adrĕch Juđa. Păng Kông Siôn mă Sư 'mêm kơeng.

⁶⁹ Sư pơdơ̆ng hnam 'lơ̆ng rơgoh Sư thoi anih tơ plĕnh ti Thoi plei teh mă sư đei pơjing boih kơjăp ling-lang

⁷⁰ Sư rơih iŏk Đawit đĭch đam Sư. Iŏk sư đơ̆ng lăm war triu;

⁷¹ Sư rôp iŏk Đawit đơ̆ng oei wei-lăng triu. Wă kơ Đawit jing bơngai wei-lăng adrĕch Jakôp, kon pơlei pơla Sư. Pơm pơtao Isơrael, kon pơlei pơla sư.

⁷² Đawit wei lu sư kiơ̆ kơ jơhngơ̆m 'lơ̆ng tơpăt. Hăm tơdrong gơh hơgei na chông anhăk lu sư.