Horiso 77 - Sơ̆p Hlabơar Nơ̆r 'Bok Kei-Dei

Lăm Kră Yang 'Bok Kei-Dei, đei jơhngơ̆m pơlung

¹ Inh krao apinh Kră Yang 'Bok Kei-Dei. Inh ôr krao Kră Yang 'Bok Kei-Dei; Sư kơtơ̆ng nơ̆r inh.

² Lăm năr anat anot inh krao chă Kră Yang; Kơmăng inh yơ̆r ti krao apinh ưh kơ rơgah; Bơhngol inh ưh kơ wă bu pơlung

³ Inh 'blŏk kơ Ih, ơ Kră Yang 'Bok Kei-Dei Inh ôr tơtok, Inh tơchĕng dêh na jơhngơ̆m inh rơdu rơmơ̆n. Sêla

⁴ Ih wei gơnur măt inh oei lar, Inh rŭng răng mah ưh pă gơh pơma.

⁵ Inh tơchĕng kơ chăl sơ̆, kơ lu sơnăm mă hloh boih sơ̆ ki,

⁶ Kơmăng inh 'blŏk dơ̆ng 'bai hơri inh, Jơhngơ̆m inh tơchĕng păng bơhngol inh chă apinh:

⁷ “Kră Yang achăng lê̆ bơ̆n hlŏng hloi boih hă? Sư ưh pă mơnat ăn kơ bơ̆n dơ̆ng hă?

⁸ Tơdrong mơnat Sư ưh pă đei boih hă Nơ̆r Sư pơkă wă jor hlŏng hloi boih hă?

⁹ Kră Yang 'Bok Kei-Dei hiơt tơdrong mơnat ăn boih hă? Lăm Sư hil mĭl Sư chĭt lê̆ pă mơnat boih hă?” Sêla

¹⁰ Inh khan: “Âu boih pơmat-tat kơ inh, Ti 'ma Kră Yang Tih Hloha tơplih boih.”

¹¹ Inh tơ'blŏk dơ̆ng kơ dôm tơdrong jang Kră Yang, Inh 'blŏk dơ̆ng kơ lu tơdrong mơsêh hlĭch Ih pơm sơ̆

¹² Inh kư̆m gô tơchĕng kơ dôm tơdrong Ih pơm boih. Păng oei tơchĕng kơ lu tơdrong jang hlĭch Ih noh.

¹³ Ơ Kră Yang 'Bok Kei-Dei, tôm tơdrong Ih pơm 'lơ̆ng rơgoh ngăl. Hăm đei yang kiơ tih hơtŏ hăm Kră Yang 'Bok Kei-Dei ưh?

¹⁴ Ih boih Kră Yang 'Bok Kei-Dei oei pơm tơdrong hlĭch chrơp, Ih đei tơ'bôh boih tơdrong mơsêh Ih kơ kon pơlei.

¹⁵ Ih yua kơkŏng ti Ih kơdih pơklaih kon pơlei pơla Ih. Lu kon drŏ-nglo Jakôp păng kon drŏ-nglo Jôsep. Sêla

¹⁶ Ơ Kră Yang 'Bok Kei-Dei. Lu đak 'bôh Ih hli tơtơ̆; Lu sơlŭng jrŭ kư̆m tơrơ.

¹⁷ Lu hơmơ̆l pruh đak 'mi, Tơ rơwơ̆ng đei re jơwa grơ̆m glaih đei kơmlat thoi 'brơ̆m tơ jơ̆p-jang.

¹⁸ Grơ̆m Ih re kiơ̆ lăm kial hơbŭt; Kơmlat pơchrang hơdah kơ teh đak; Teh pơpơ̆ păng tơdrŏ.

¹⁹ Ih yak lăm đak dơsĭ. Trong Ih rok đak dơsĭ jrŭ, mă-lei đêl jơ̆ng Ih ưh kơ đei bu 'bôh.b

²⁰ Ih yua ti Môis păng Arôn chông anhăk kon pơlei pơla Ih thoi khŭl triu.