Horiso 76 - Sơ̆p Hlabơar Nơ̆r 'Bok Kei-Dei

Ư-ang tơdrong mơsêh Kră Yang 'Bok Kei-Dei Jakôp blah lu ayăt jei sư

¹ Lăm Juđa, đe băt hơđăl kơ Kră Yang 'Bok Kei-Dei, Anăn Sư tih tơpă tơ lu bơngai Isơrael.

² Hnam anih akŭm Sư tơ Salem păng anih oei Sư tơ Siôn

³ Tơ anih noh boih Sư gơ̆ lê̆ 'brơ̆m hră. Khêl đao hơlă păng dôm tơmam tơblah. Sêla

⁴ Kră Yang ư-ang rang mơnhal. Wih đơ̆ng kông blah jei.

⁵ Lu bơngai nuih kơtang đe tơgar iŏk tơmam tơblah lu sư đĭ boih. Lu sư tep hlŏng hloi pă đei bu nuih pran mă oei gơh hiŏng kơkŏng ti.

⁶ Ơ Kră Yang 'Bok Kei-Dei Jakôp, mưh Ih hil chrih, Gre aseh păng lu aseh pơ̆k lôch đĭ

⁷ Lăp minh 'nu Ih đĕch trŏ kơ hli yom; Layơ Ih hil bu kĕ dơ̆ng 'bơ̆t anăp Ih

⁸ Ih pơma khan đơ̆ng plĕnh kơ tơdrong sek tơlang. Na teh hli tơrơ, ngăn hreh. Sêla

⁹ Mưh Kră Yang 'Bok Kei-Dei iung sek tơlang. Wă dŏng pơklaih lu bơngai 'lơ̆ng tơpăt kơpal teh.

¹⁰ Tơpă tơdrong kon bơngai hil kư̆m jing hơri bơnê kơ Ih, Lu bơngai mă oei đei arih noh. Gô năm pơm giĕng ư-ang kơ Kră Yang.

¹¹ Pơkă bĕ lu kon pơlei oei tăp dăr kơ sư păng pơm pơkeh nơ̆r pơkă hăm Kră Yang 'Bok Kei-Dei iĕm; Pơyơ̆r bĕ tơmam soi kơ Kră Yang, Sư boih trŏ kơ hli yom.

¹² Sư gô hŭt lê̆ tơdrong pơang, đơ̆ng lu yŏng mơng; Pơm kơ lu pơtao lăm teh đak, hli tơrơ kơ Sư.