Horiso 75 - Sơ̆p Hlabơar Nơ̆r 'Bok Kei-Dei

Kră Yang 'Bok Kei-Dei tơjur lu bơngai pơang hơtŏk lu bơngai 'lơ̆ng tơpăt

¹ Ơ Kră Yang 'Bok Kei-Dei, lu nhôn bơnê kơ Ih, Lu nhôn kơkuh bơnê kơ Ih, yua kơ Ih jê̆ lu nhôn: Lu nhôn ră roi tơdrong hlĭch chrơp đơ̆ng Ih pơm

² Truh 'bơ̆t jơ Inh pơkă boih, Inh gô đei sek tơlang tơpăt.

³ Mă khan teh păng kon pơlei oei kơpal teh pơpơ̆, Inh boih pơkơ̆ng jrăng sư kơjăp. Sêla

⁴ Inh khan kơ lu pơang: “'Nĕ pă pơang.” Hăm khan kơ lu bơngai kơnê̆: “'Nĕ pă pơư khan pran kơtang.

⁵ 'Nĕ pă tưk hơke kơjung wă blah plĕnh. 'Nĕ pă pơma pơrŏ toh hơko.”

⁶ Ưh kơ trŏ đơ̆ng gah hơlĕch gah bơmơ̆t. Dah đơ̆ng char glă ôh mă đei tơdrong kơkuh pơyom

⁷ Mă-lei Kră Yang 'Bok Kei-Dei Tơ'ngla sek tơlang; Sư tơjur đe âu păng hơtŏk đe noh.

⁸ Lăm ti Kră Yang đei chĕp pơnhan. Tơdrô blôk yuh; Sư tuh 'bĕnh kơ tơdrô hơkăm. Đĭ-đăng lu bơngai kơnê̆ lăm teh đak gô huch tơdrô noh; păng huch pơgoh đĭ kơdroh sư.

⁹ Gah inh wă ră roi tơdrong sư noh ling-lang Inh kư̆m gô hơri bơnê kơ Kră Yang 'Bok Kei-Dei Jakôp.

¹⁰ Inh gô ret lê̆ đĭ hơke lu bơngai kơnê̆, mă-lei gah hơke lu bơngai tơpăt gô hơtŏk kơjung.