Horiso 74 - Sơ̆p Hlabơar Nơ̆r 'Bok Kei-Dei

Krao apinh Kră Yang Dŏng

¹ Kră Yang 'Bok Kei-Dei, yua kơ kiơ Ih achăng lê̆ nhôn ling-lang? Liơ Ih hil kơ lu triu lăm tơmăn 'nhĕt hơdrih Ih?

² Apinh Ih 'blŏk kơ kon pơlei mă Ih đei huai iŏk sơ̆, Adrĕch adrung mă ih đei dŏng pơklaih wă jing kon pơlei Ih. Apinh 'blŏk kơ Kông Siôn, mă anih Ih oei boih.

³ Apinh Ih yak bĕ tơ anih mă pơrăm noh. Lu ayăt pơrăm lê̆ đĭ boih anih 'lơ̆ng rơgoh.

⁴ Lu ayăt kơ Ih mă ôr tơkĕch boih tơ lăm anih 'lơ̆ng rơgoh Ih. Lu sư pơdơ̆ng boih hla-kơ wă pơm tơdra jei sư.

⁵ Lu sư thoi bơngai chĕp sung yơ̆r hơ-ô wă kăl 'long.

⁶ Lu sư yua sung păng mut teh tơpăk pơchah đĭ tơmam pơm păng 'long đe traih pơiel.

⁷ Lu sư soh lê̆ anih 'Lơ̆ng rơgoh Ih truh tơ teh, lu sư pơm pơ'mê̆ kơ anih Anăn Ih.

⁸ Lu sư khan lăm jơhngơ̆m: “Bĕ lu bơ̆n pơrăm pơgoh!” Lu sư soh lê̆ boih hnam akŭm kơkuh kơ Kră Yang 'Bok Kei-Dei kơpal teh,

⁹ Lu nhôn pă đei 'bôh tơdra hlĭch. Ưh pă đei bơngai khan lê̆ adrol tơ lăm lu nhôn kư̆m ưh pă đei bu băt tơdrong âu dĭng truh tơ dang yơ.

¹⁰ Ơ Kră Yang 'Bok Kei-Dei, lu ayăt gô pơjăm pơjuă Ih dĭng truh dang yơ? Wă lê̆ lu ayăt pơma kơnê̆ kơ anăn Ih ling-lang đĕch hă?

¹¹ Liơ Ih dui lê̆ ti gah 'ma Ih noh. Yơ̆r bĕ ti Ih păng pơlôch đĭ lu sư.

¹² Mă-lei Kră Yang 'Bok Kei-Dei jơ̆ pơtao inh đơ̆ng sơ̆. Oei dŏng pơklaih tơ jơ̆p kơ teh đak.

¹³ Kră Yang yua boih tơdrong mơsêh Ih klah asong đak dơsĭ. Teh pơchah kơ̆l sem brem kơnê̆ lăm đak.

¹⁴ Kră Yang Ih pơjuă pơhĕch lê̆ kơ̆l Lêwiathan; Pơm kơ sư jing tơmam sa kơ lu bơngai mă oei tơ char 'blach.

¹⁵ Ih boih pơih tu đak lĕch ăn kơ krong đei đak ro, păng pơhrơ̆ lê̆ lu đak krong tih.

¹⁶ Kơ'năr jơ̆ Ih kơmăng kư̆m lei-lăi; Ih boih pơjing kơ măt khei măt 'năr.

¹⁷ Ih đei pơjing boih kơ teh, Păng pơjing kơ bơyan puih, bơyan hngach.

¹⁸ Ơ Kră Yang, 'blŏk bĕ lu ayăt kơ Ih pơjăm Ih, Kon pơlei pơjăm Ih, kon pơlei kơtul kơwao blei hiap anăn Ih.

¹⁹ Apinh 'nĕ pơjao tơdrong arih sem kơtơp Ih kơ lu sem bri. 'Nĕ hiơt ling-lang kơ lu bơngai pơmat-tat Ih.

²⁰ Apinh Ih 'blŏk kơ đêl nơ̆r pơgơ̆p; Yua kơ anih măng mu lăm teh đak 'bĕnh kơ tơdrong kơnê̆.

²¹ 'Nĕ ăn kơ lu bơngai mă đe pơjuă mơlâu. Ăn kơ lu bơngai pơmat-tat păng dơnuh hin băt hơri bơnê kơ anăn Ih

²² Ơ Kră Yang 'Bok Kei-Dei, iung bĕ dŏng tơdrong Ih, Athei 'blŏk bĕ lu kơtul pơjăm Ih prăt năr?

²³ 'Nĕ hiơt kơ nơ̆r lu ayăt kơ Ih Nơ̆r ôr tơkĕch tơjrông tơjrang pă pơdơh blah Ih