Horiso 73 - Sơ̆p Hlabơar Nơ̆r 'Bok Kei-Dei

SƠ̆P MĂ PÊNG Kră Yang 'Bok Kei-Dei sek tơlang tơpăt

¹ Kră Yang 'Bok Kei-Dei pơm 'lơ̆ng tơpă kơ lu bơngai Isơrael. Lu bơngai mă đei jơhngơ̆m 'lơ̆ng rơgoh.

² Mă-lei jơ̆ng inh pă 'biơ̆ wă jê̆ kơtơih yak inh wă jê̆ tơsĕr pơ̆k.

³ Yua kơ inh 'bôh lu bơngai kơnê̆ đei tơdrong hiôk chơt. Inh đei jơhngơ̆m gar lu bơngai pơang.

⁴ Lu sư ưh kơ đei jĭ pơmat. Akâu jăn lu sư oei pran hiôk,

⁵ Lu sư ưh kơ đei pơmat thoi đe nai. Kŭm huay kơ răm thoi gơ̆p buăl.

⁶ Lei na lu sư iŏk tơdrong pơang pơm thoi rơbưn maih 'băk tơ hơko. Lu sư iŏk tơdrong kơnê̆ pơm thoi ao pĕng akâu.

⁷ Măt lu sư pơ'ngeh yua kơ tơdrong kơnê̆; jơhngơ̆m lu sư 'bĕnh kơtul kơwao.

⁸ Lu sư blei hiap, pơma kơnê̆ tơpă; Lu sư pơjăm pơjuă đe nai, na chă đon wă pơjuă bơngai nai.

⁹ 'Bơ̆r lu sư pơma kơnê̆ kơ Kră Yang tơ plĕnh. Hơpiĕt lu sư chă hơlĕnh kơ bơngai lăm teh đak.

¹⁰ Lei na kon pơlei wơ̆t kiơ̆ lu sư, pơm kiơ̆ pơđĭ thoi tơdrong lu sư chă đon.

¹¹ Lu sư khan: “Liơ Kră Yang 'Bok Kei-Dei gơh băt? Thoi yơ Kră Yang Tih Hloh gơh hlôh?”

¹² Lu bơngai kơnê̆ thoi noh, Lu sư oei hiôk-hian rai mơdrŏng dêh.

¹³ Tơdrong kơ đei inh kư̆ hrăn wei jơhngơ̆m rơgoh, ôp ti huay kơ pơm yoch.

¹⁴ Prăt năr inh đei gleh truh, rim pơgê inh đei phak pơjĭ.

¹⁵ Dah inh đei khan: “Inh gô pơma thoi âu,” Lei inh pơm ưh kơ tơpăt kơ lu adrĕch adrung kon pơlei Ih boih.

¹⁶ Mưh inh tơchĕng wă kơ băt đĭ tơdrong noh, lei gleh dêh kơ inh.

¹⁷ Dĭng truh tơ inh mơ̆t lăm anih rơgoh Kră Yang 'Bok Kei-Dei, Lei inh băt gah năr tôch lu sư.

¹⁸ Tơpă Ih dan boih lu sư 'bơ̆t trong tơsĕr. Ăn kơ lu sư huŏng tơ lăm anih lôch hiong.

¹⁹ Ơ lăng deh, lu sư răm hloi 'bônh đĕch! Tơdrong hli krưp hơpuih pơgoh lu sư.

²⁰ Ơ Kră Yang nhen thoi apo wă hơđơ̆r 'biao, wă Ih iung Ih hiơt kơ lu sư thoi noh mơ̆n

²¹ Kơplah inh ơh sơ'ngon, inh jĭ jơhngơ̆m thoi sa tăng.

²² Kơplah noh inh oei kơtul kơwao ưh kơ băt tơdrong kiơ. 'Bơ̆t anăp Ih inh nhen thoi sem brem đĕch.

²³ Mă-lei, inh oei hăm Ih ling-lang; Ih rôp ti 'ma inh.

²⁴ Ih yua tơdrong bơtho tơ'bôh na dui ba inh. Đơ̆ng noh sơng iŏk inh lăm tơdrong ư-ang.

²⁵ Tơ kơpal plĕnh inh ưh kơ đei bu, 'nguaih Kơ Kră Yang? Lăm teh đak, inh ưh kơ đei hơpơi chă bu nai 'nguaih Kơ Ih.

²⁶ Sĕch akar păng jơhngơ̆m inh gô răm; Mă-lei Kră Yang 'Bok Kei-Dei ăn jơhngơ̆m inh pran kơtang păng tơmam inh yua gĭt ling-lang.

²⁷ To lu bơngai ataih đơ̆ng Ih gô hiong răm; Ih gô pơrăm lê̆ lu bơngai kuă kơ chu Ih.

²⁸ Gah inh 'lơ̆ng dêh, oei jê̆ Kră Yang 'Bok Kei-Dei. Inh gơnang kơ Kră Yang jing anih inh kơ'nơp wă kơ inh ră roi dôm tơdrong jang Ih.