Horiso 71 - Sơ̆p Hlabơar Nơ̆r 'Bok Kei-Dei

Bơngai Kră Yang krao apinh Kră Yang pơklaih sư

¹ Ơ Kră Yang! Inh kơ'nơp lăm Ih; 'Nĕ ăn kơ inh kơdơ̆ mơlâu.

² Lăm tơdrong tơpăt Ih, apinh Ih dŏng pơklaih inh păng ăn kơ inh gơh rơngei. Pơgling đon mơ̆ng inh păng pơklaih inh.

³ Ih thoi tơmo tih, anih inh kơ'nơp; tơ lăm noh ling-lang; Ăn nơ̆r tơtă wă pơklaih inh. Yua kơ Ih jơ̆ kơđông păng tơmo pĕng inh.

⁴ Ơ Kră Yang 'Bok Kei-Dei inh, apinh dŏng pơklaih inh đơ̆ng ti lu bơngai pơm kơnê̆, Klaih đơ̆ng ti lu hơlĕnh păng bơngai pơm kơnê̆ dêh.

⁵ Yua kơ, ơ Kră Yang! Ih boih mă inh chang gô. Mă inh gơnang đơ̆ng inh oei 'lơ̆p sơ̆.

⁶ Inh hơđơ̆ng kơ Ih đơ̆ng 'nao tơpŭ sơ̆; Ih boih Kră Yang ăn mĕ inh hơiơch kơ inh. Inh gô bơnê kơ Ih ling-lang

⁷ Inh nhen tơmam pơm hlĭch kơ lơ bơngai, mă-lei Ih jơ̆ anih inh kơ'nơp kơjăp.

⁸ Rim năr 'bơ̆r inh hơri bơnê kơ Ih, păng kơkuh pơyom kơ Ih.

⁹ Apinh Ih 'nĕ pơpuh inh kơplah inh đĭ kră, dah jơhngơ̆m inh pă kĕ.

¹⁰ Yua kơ lu bơngai ayăt pơma ayăt kơ inh, Lu sư pơđâu băl wă pơlôch inh.

¹¹ Păng khan: “Kră Yang 'Bok Kei-Dei achăng lê̆ sư boih; Bĕ druh rôp sư, yua kơ ưh kơ đei bu dŏng pơklaih sư.”

¹² Ơ Kră Yang 'Bok Kei-Dei! Lê̆ kơ hơtaih đơ̆ng inh. Ơ Kră Yang 'Bok Kei-Dei. Tơgŭm pơklaih inh mă kuăng kuăng.

¹³ Ăn kơ lu ayăt kơ inh mơlâu păng răm đĭ; Ăn bĕ kơ lu bơngai chă pơlôch inh, đe pă pơyom păng hlơ̆l mơlâu,

¹⁴ Mă-lei gah inh chang hơmĕng kơ Ih ling-lang. Păng bơnê kơ Ih rai dêh.

¹⁵ Rim năr 'bơ̆r inh gô ră roi tơdrong tơpăt păng tơdrong Ih dŏng pơklaih. Mă inh ưh kơ băt jô̆ lơ dôm yơ.

¹⁶ Inh gô năm păng roi tơdrong mơsêh Kră Yang; Inh gô lăp minh Ih roi gah tơdrong tơpăt Ih đĕch

¹⁷ Ơ Kră Yang 'Bok Kei-Dei, Ih bơtho boih inh đơ̆ng oei 'lơ̆p. Dĭng truh tơ dang ei, inh oei roi tơbăt gah tơdrong jang hlĭch chrơp Ih.

¹⁸ Ơ Kră Yang 'Bok Kei-Dei, mă khan inh kră, hăm sŏk ko boih. Apinh Ih 'nĕ achăng lê̆ inh, Dĭng inh đei ră roi kơ rim jơhnơr, tơdrong pran kơtang Ih. Păng tơdrong gơh kĕ mơsêh mơyang Ih kơ lu bơngai.

¹⁹ Ơ Kră Yang 'Bok Kei-Dei, tơdrong tơpăt Ih kơjung tĭk tơ plĕnh. Ih đei pơm boih tơdrong jang tih. Ơ Kră Yang 'Bok Kei-Dei, bu đei thoi Ih?

²⁰ Ih đei ăn boih kơ inh tơdrong gleh pơmat krưp: Ih gô pơrih inh păng pôk hơtŏk inh đơ̆ng sơlŭng jrŭ lăm teh đak.

²¹ Ih gô pơư kơ inh rai dêh tơdrong 'lơ̆ng rŏ rai dêh. Hơlơ̆k pơlung inh dơ̆ng.

²² Ơ Kră Yang 'Bok Kei-Dei! Inh gô yua tĭng-nĭng reh hơri bơnê kơ Ih. Inh gô hơri kơ tơdrong tơpăt Ih; Ơ Kră Yang 'lơ̆ng rơgoh đe Isơrael, Inh gô yua tĭng-nĭng dơ̆ng hơri bơnê kơ Ih.

²³ 'Bơ̆r păng bơhngol inh mă Ih đei huai iŏk. Gô ôr chơt, mưh inh hơri bơnê kơ Ih.

²⁴ Rim năr hơpiĕt inh gô roi tơdrong tơpăt Ih; Yua kơ lu bơngai chă pơrăm inh mơlâu đĭ păng hlơ̆l kơdơ̆ ngăl boih.