Horiso 70 - Sơ̆p Hlabơar Nơ̆r 'Bok Kei-Dei

Apinh Kră Yang dŏng Tơdrong hơri Đawit pơm, ăn kơ thây bơtho wă kơ 'blŏk.

¹ Ơ Kră Yang 'Bok Kei-Dei! Tĕnh jah dŏng pơklaih inh; Kră Yang! Tĕnh jah tơgŭm inh.

² Ăn kơ lu bơngai wă pơrăm tơdrong arih inh, Đĭ-đăng gô kơdơ̆ mơlâu. Ăn kơ lu bơngai 'maih pơmat inh. Kơdŭn tơ rŏng păng mơlâu.

³ Ăn kơ lu bơngai hiĕk kơ inh: “Ha, ha! Ha, ha?” Kơdŭn tơ rŏng, yua kơ lu sư kơdơ̆ mơlâu

⁴ Ăn kơ đĭ-đăng lu bơngai mă krao chă Ih, chhôk ngă 'nă hal tơ lăm Ih; Ăn kơ lu bơngai mă 'mêm tơdrong Ih dŏng pơklaih. Khan ling-lang: “Kră Yang 'Bok Kei-Dei tih-tin.”

⁵ Gah inh tơnat pat, Kră Yang 'Bok Kei-Dei! Mă kuăng bĕ năm tơ inh. Ih boih Tơ'ngla dŏng tơgŭm inh păng pơklaih inh; Ơ Kră Yang 'nĕ kơ pơhiơ̆.