Horiso 7 - Sơ̆p Hlabơar Nơ̆r 'Bok Kei-Dei

Tơ'ngla pơm tơdrong hơri apinh Kră Yang tơgŭm dŏng đơ̆ng lu bơngai kơnê̆

¹ Ơ Kră Yang Kră Yang 'Bok Kei-Dei inh, inh kơ'nơp lăm Ih; Apinh Ih dŏng pơklaih inh đơ̆ng lu bơngai kơnê̆ druh,

² Kơnh lu sư hek sa inh thoi dăm-brang, păng hek hơđah lê̆ akâu inh ưh kơ đei bu dŏng inh.a

³ Ơ Kră Yang Kră Yang 'Bok Kei-Dei inh; dah inh pơm boih dôm tơdrong noh, Păng đei pơm kơnê̆ đơ̆ng ti inh;

⁴ Dah inh tơtông iŏk đơ̆ng bơngai mă oei hiôk-hian hăm inh, păng pơm kơnê̆ boih, bu pơm kơnê̆ kơ inh tơdrong ưh kơ đei.

⁵ Lei ăn kơ ayăt kơ inh, druh inh tam, pơjuă lê̆ tơdrong arih inh tơ teh, păng 'bŭ lê̆ tơdrong ư-ang inh lăm 'mui teh. Sêla

⁶ Ơ Kră Yang, iung bĕ lăm năr Ih blĕk, Iung blah bĕ hăm lu ayăt kơ inh; Iung hơdơ̆r bĕ ơ Kră Yang 'Bok Kei-Dei tơbăt bĕ tơdrong sek tơlang.

⁷ Ơ khŭl kon bơngai akŭm bĕ tăp dăr kơ Ih; đơ̆ng anih kơpal, apinh Ih jur tơ lu sư.

⁸ Kră Yang tih hloh, sek tơlang kơ kon bơngai. Ơ Kră Yang, apinh Ih sek tơlang kơ inh, kiơ̆ thoi tơdrong tơpăt, păng kiơ̆ tơdrong rơgoh sĭt lăm jơhngơ̆m inh.

⁹ Ơ Kră Yang 'Bok Kei-Dei tơpăt! Ih boih Kră Yang lăng lăm jơhngơ̆m kon bơngai, Apinh Ih pơtôch lê̆ dôm tơdrong kơnê̆ lu bơngai kơnê̆ wă pơm. Mă-lei pơm bĕ kơ lu bơngai tơpăt mă kơjăp.

¹⁰ Kră Yang 'Bok Kei-Dei jơ̆ khêl inh, Sư dŏng pơklaih lu bơngai đei jơhngơ̆m tơpăt.

¹¹ Kră Yang 'Bok Kei-Dei jơ̆ Kră Yang sek tơlang tơpăt, Mă-lei rim năr Kră Yang 'Bok Kei-Dei oei hil.

¹² Tơdah lu bơngai kơnê̆ ưh kơ tơbral, Kră Yang 'Bok Kei-Dei gô pat đao Sư, Hơ'năk lê̆ hră Sư răp tơ noh

¹³ Sư hơmet lê̆ khêl đao wă pơlôch, Sư hơmet 'brơ̆m ŭnh.

¹⁴ To lu sư anăp tơdrong kơnê̆, oei găn tơdrong kơnê̆ na hơiơch tơdrong hơlĕnh

¹⁵ Sư sir sơlŭng kôch jrŭ, Na lu sư huŏng tơ lăm hơlŭng đêl lu sư sir.

¹⁶ Tơdrong lu sư pơm gô tuh tơ lu sư kơdih. Tơdrong kơnê̆ lu sư kư̆m tuh tơ kơ̆l lu sư.

¹⁷ Inh gô bơnê kơ Kră Yang yua kơ tơdrong 'lơ̆ng tơpăt Sư Inh gô hơri bơnê kơ Anăn Kră Yang, jơ̆ Kră Yang tih hloh.