Horiso 69 - Sơ̆p Hlabơar Nơ̆r 'Bok Kei-Dei

Nơ̆r ôr krao kơ tơgŭm

¹ Ơ Kră Yang 'Bok Kei-Dei! Apinh Ih dŏng pơklaih inh. Yua kơ đak lơ̆p truh tơ hơko inh boih.

² Inh puh lăm hlŭt jrŭ, anih chro jơ̆ng ưh pă tôch. Inh glơ̆k lăm đak jrŭ, đak lơ̆p lê̆ inh.

³ Inh ôr đĭ lap, hơlŏng inh đĭ kro; Măt inh đĭ rơgah yua kơ chang gô Kră Yang 'Bok Kei-Dei.

⁴ Lu bơngai areh kơ inh tơdrong kơđei, lơ hloh kơ sŏk kơpal kơ̆l inh; Lu pơm ayăt kơ inh tơdrong kơ đei, lu bơngai wă pơrăm inh kơtang tơpă. Inh athei 'mong dôm tơmam mă inh ưh kơ tơtông iŏk ră.

⁵ Ơ Kră Yang 'Bok Kei-Dei! Ih băt kơ tơdrong kơtul kơwao inh. Dôm tơdrong yoch inh ưh kơ gơh ôn kơ Ih.

⁶ Ơ Kră Yang Tih Hloh 'nĕ ăn kơ lu bơngai chang gô Ih đei mơlâu yua kơ inh. Ơ Kră Yang 'Bok Kei-Dei lu bơngai Isơrael! 'Nĕ ăn kơ lu bơngai mă chă Ih đe pơ'brơh yua kơ inh.

⁷ Noh yua kơ Ih na inh pŭ iŏk tơdrong đe pơjăm, tơdrong mơlâu 'bĕnh kơ muh măt inh.

⁸ Inh jing thoi bơngai tơmoi kơ 'nhŏng oh inh. Thoi gơ̆p nai kơ lu 'nhŏng oh drŏ-nglo kon mĕ inh

⁹ Yua kơ tơdrong hưch hanh kơ Hnam Ih dang luăn sa inh. Tơdrong đe hiĕk pơjăm Ih 'bơm boih tơ inh.

¹⁰ Mă inh nhơ̆m ơh, păng ơ̆t kơ sŏng sa. Noh kư̆m pơm kơ inh mơlâu.

¹¹ Mă inh iŏk 'bi hrŭk pơm ao tai, Inh jing pơm kơ lu sư hiĕk ăr.

¹² Lu bơngai ngôi 'bơ̆t măng jang che bơle kơ inh; Inh jing nơ̆r lu et tơdrô hơri jô̆.

¹³ Mă-lei ơ Kră Yang! Inh krao apinh kơ Ih! Ơ Kră Yang 'Bok Kei-Dei lăm tơdrong Ih 'mêm mơnat apinh Ih tơl tơwih nơ̆r inh, Hăm tơdrong dŏng pơklaih sĭt Ih.

¹⁴ Apinh Ih dŏng pơklaih inh đơ̆ng lăm hlŭt, 'nĕ ăn kơ inh đom. Tơgŭm kơ inh hlôi đơ̆ng lu bơngai areh kơ inh, păng hlôi kơ đak jrŭ.

¹⁵ 'Nĕ ăn kơ đak lơ̆p inh, păng sơlŭng jrŭ hiup inh. 'Bơ̆r hơlŭng hơlih klơ̆p inh.

¹⁶ Ơ Kră Yang! Apinh Ih tơl tơwih kơ inh, yua kơ tơdrong 'mêm 'lơ̆ng Ih; Kiơ̆ kơ tơdrong 'mêm mơnat Ih, apinh wih tơ inh.

¹⁷ Apinh Ih 'nĕ kơ ôn muh măt Ih kơ inh, Đĭch đam Ih, yua kơ inh oei pơmat-tat; Jah drơ̆ng nơ̆r inh bĕ.

¹⁸ Apinh Ih năm jê̆ inh păng huai iŏk bơhngol inh. Apinh dŏng pơklaih inh đơ̆ng lu bơngai ayăt.

¹⁹ Ih băt tơdrong mơlâu, tơdrong đe pơjăm pơjuă păng tơdrong đe pơ'brơh kơ inh. Lu bơngai ayăt kơ inh oei 'bơ̆t anăp Ih.

²⁰ Inh pơmat-tat dêh, jơhngơ̆m inh pơchah yua kơ tơdrong mơlâu. Inh oei chang bơngai mơnat kơ inh, mă-lei ưh kơ đei bu; Inh chang đei bơngai pơlung, mă-lei ưh đei 'bôh bu.

²¹ Lu sư ăn hla tăng pơm tơmam sa inh. Păng ăn kơ inh nhă đak iŭ kơplah rơhing.

²² Ăn kơ gơ'bang sŏng sa lu sư jing hơđong hơ'năk kơ lu sư. Sŏng sa hiôk-hian nhen hơnhuăl hrơ̆p lu sư kơdih.

²³ Ăn kơiĕng lu sư pơpơ̆ hơnơ̆ng ăn kơ măt lu sư tol, ưh pă 'bôh dơ̆ng.

²⁴ Tuh bĕ tơdrong hil Ih tơ lu sư. Ăn tơdrong hil mĭl Ih truh tơ lu sư.

²⁵ Ăn kơ anih oei lu sư jing juơ. Ưh pă đei bu oei tơ lăm anih noh dơ̆ng.

²⁶ Yua kơ lu sư pơmat lu bơngai mă Kră Yang teh boih, Păng lu sư chă roi tơdrong pơmat-tat lu bơngai mă Ih ăn đei rơka.

²⁷ Apinh Ih pơthim tơdrong kơnê̆ kơ tơdrong kơnê̆ lu sư; 'Nĕ jô̆ kơ lu sư đei lăm tơdrong tơpăt Ih.

²⁸ Sŭt lê̆ anăn lu sư đơ̆ng lăm sơ̆p hla bơar tơdrong arih. Ưh kơ gơh chih tơmơ̆t hơdai hăm lu bơngai tơpăt

²⁹ Gah inh pơmat-tat răm-'băm: Na ơ Kră Yang 'Bok Kei-Dei apinh Ih dŏng pơklaih păng hơtŏk inh tơ anih kơjung.

³⁰ Inh gô bơnê kơ anăn Kră Yang 'Bok Kei-Dei hăm nơ̆r hơri. Yua nơ̆r bơnê na pơư pơang kơ Sư.

³¹ Tơdrong âu lăp đon Kră Yang hloh kơ tơmam pơyơ̆r hăm rơmo, Mă rơmo tơno đei hơke păng kơchôp blah.

³² Lu bơngai pơmat-tat 'bôh tơdrong noh gô chơt hiôk, Ơ lu bơngai mă krao chă Kră Yang 'Bok Kei-Dei. Jơhngơ̆m lu iĕm gô arih.

³³ Yua kơ Kră Yang mơ̆ng lu bơngai dơnuh hin. Ưh kơ đei areh ôh kơ lu bơngai mă đe pơm bơnă.

³⁴ Ơ plĕnh, teh, đak dơsĭ păng kon sem brem lăm noh, đĭ-đăng bơnê bĕ kơ Sư.

³⁵ Yua kơ Kră Yang 'Bok Kei-Dei gô pơklaih Siôn păng wă pơjing dơ̆ng lu pơlei tih lăm Juđa; Kon pơlei Sư gô oei tơ noh, iŏk teh jang sa.

³⁶ Adrĕch adrung đĭch đam sư gô yua iŏk teh noh jang sa. Dôm lu đe bu mă 'mêm kơ anăn Sư gô oei tơ noh.