Horiso 68 - Sơ̆p Hlabơar Nơ̆r 'Bok Kei-Dei

Lu bơngai Isơrael hơri hiôk kơ jei

¹ Ơ Kră Yang 'Bok Kei-Dei iung bĕ, pơm ăn kơ lu ayăt kơ Ih tơklah tơklang. Ăn kơ lu bơngai hil areh kơ Sư kơdâu ôn đơ̆ng anăp Sư.

² 'Nhui đông hach thoi yơ, Kră Yang gô pơm kơ lu sư hach thoi noh mơ̆n; Kŭm thoi jrĕnh lek kơ ŭnh thoi yơ, Dôm lu bơngai kơnê̆ gô lôch 'bơ̆t anăp Kră Yang 'Bok Kei-Dei thoi noh mơ̆n.

³ Lu bơngai tơpăt gô 'nă hal, chơt hiôk 'bơ̆t anăp Kră Yang 'Bok Kei-Dei; Tơpă lu sư gô đei jơhngơ̆m chơt hiôk.

⁴ Hơri pơư bĕ kơ Kră Yang 'Bok Kei-Dei bơnê bĕ kơ anăn Sư; Man hơmet bĕ trong kơ Kră Yang hao hơmơ̆l năm rok anih glă; Anăn Sư jơ̆ Kră Yang; Chơt hiôk bĕ 'bơ̆t anăp Sư.

⁵ Kră Yang 'Bok Kei-Dei oei tơ anih rơgoh. Sư jing 'Bă kơ lu mơti, Păng jing Tơ'ngla wei lu drŏ-kăn adro.

⁶ Kră Yang 'Bok Kei-Dei ăn kơ lu bơngai hơdrô̆ đei hnam dơnŏ. Chông ba lu bơngai bơnă ăn kơ lu sư pŭn hiôk; Lu bơngai pơm kơnê̆ ayăt gô oei tơ teh kro pơdang.

⁷ Ơ Kră Yang 'Bok Kei-Dei kơplah Ih năm 'bơ̆t anăp lu kon pơlei pơla Ih; Kơplah Ih yak truh tơ char 'blach Sêla

⁸ Teh gô pơpơ̆, đơ̆ng plĕnh gô đei 'mi jur 'bơ̆t anăp Kră Yang 'Bok Kei-Dei. Kông Sinai kư̆m pơpơ̆ 'bơ̆t anăp Kră Yang 'Bok Kei-Dei, jơ̆ Kră Yang 'Bok Kei-Dei lu bơngai Isơrael.

⁹ Ơ Kră Yang 'Bok Kei-Dei! Ih ăn 'mi jruh lơ tơpă Ih ăn tơmam iung hơdrih. Dah lu sư jô hŏnh boih.

¹⁰ Ơ Kră Yang 'Bok Kei-Dei, khŭl kon pơlei Ih oei tơ noh. Yua kơ Ih đei jơhngơ̆m 'mêm mơnat. Ih hơmet boih tơmam kơ lu bơngai pơmat-tat.

¹¹ Kră Yang hơtă nơ̆r; mă lu drŏ-kăn kư̆m roi tơbăt nơ̆r ei kư̆m thoi minh khŭl lơ dêh.

¹² “Lu pơtao lu wei linh kơdâu ôn, lu sư kơdâu ôn đĭ; Lu drŏ-kăn oei tơ lăm hnam asong băl tơmam đêl lu sư blah iŏk.

¹³ Mă lu bơngai oei tơ lăm hơdrong triu, Lu sư nhen thoi pơnăr kơtơp lom păng hu. Păng sŏk sư dreng thoi maih.”

¹⁴ Kră Yang mơsêh mơyang pran kơtang pơpuh lu pơtao tơ noh; Thoi prĕl jur tơ kông Salmôn.

¹⁵ Kông Basan jơ̆ kông Kră Yang 'Bok Kei-Dei, kông Basan rŏ krưp đei lơ kơ̆l kông kơjung.

¹⁶ Ơ lu kông đei kơ̆l kơjung liơ iĕm lăng klai areh? Kông mă Kră Yang 'Bok Kei-Dei đei rơih boih, pơm anih Sư oei? Tơpă, Kră Yang gô oei tơ noh ling-lang hlŏng hloi.

¹⁷ Gre aseh Kră Yang 'Bok Kei-Dei 'bar hơngan. Lơ rơbâu hơngan, Kră Yang oei tơ lăm gre ei, năm đơ̆ng kông Sinai mơ̆t lăm anih rơgoh.

¹⁸ Kră Yang oei tơ kơpal kông. Anhăk ba lu bơnă; Kră Yang iŏk tơmam đơ̆ng kon bơngai pơyơ̆r, Păng kư̆m iŏk đơ̆ng lu bơngai ayăt mơ̆n. Kră Yang Kră Yang 'Bok Kei-Dei gô oei hơdai hăm sư.

¹⁹ Bơnê kơkuh bĕ kơ Kră Yang 'Bok Kei-Dei tơpă, Kră Yang mă rim năr pŭ trăp yua kơ bơ̆n. Wă khan Kră Yang 'Bok Kei-Dei pơklaih lu nhôn. Sêla

²⁰ Kră Yang 'Bok Kei-Dei jơ̆ Kră Yang 'Bok Kei-Dei mă huai iŏk lu bơ̆n; Noh đơ̆ng Kră Yang na mă bơ̆n gơh klaih đơ̆ng lôch

²¹ Tơpă Kră Yang 'Bok Kei-Dei gô pơjuă pơhĕch lê̆ kơ̆l lu ayăt kơ Sư. Kơpal bơwĕnh sŏk mă lu bơngai oei pơm kơnê̆.

²² Kră Yang khan: “Đơ̆ng kông Basan inh gô chông ba lu sư brŏk. Inh gô chông anhăk lu sư đơ̆ng lu anih jrŭ đak dơsĭ.

²³ Lê̆ jơ̆ng lu sư juă lăm pham, lu ayăt păng hơpiĕt kŏ lu sư kư̆m đei liah sa sĕch lu ayăt kơ lu sư.”

²⁴ Ơ Kră Yang 'Bok Kei-Dei đe 'bôh boih Ih năm sơng. Ih jơ̆ Kră Yang 'Bok Kei-Dei sơng inh, Pơtao inh, năm tơ anih rơgoh.

²⁵ Lu bơngai hơri yak adrol lu brŏ reh kiơ̆ đơ̆ng rŏng. Tŏk-bŏk đei lu adruh teh hơgơ̆r.

²⁶ “Ô lu kon sâu Isơrael kơkuh bơnê bĕ lăm năr iĕm akŭm tih. Hơri bơnê kơ Kră Yang 'Bok Kei-Dei sư boih Kră Yang.”

²⁷ To Bênjamin adrĕch tŏ sĕt, mă wei pơgơ̆r lu sư. Lu yŏng pơgơ̆r bơngai Juđa, hăm khŭl lu sư. Lu yŏng pơgơ̆r Sabulôn păng lu yŏng pơgơ̆r Neptali.

²⁸ Kră Yang 'Bok Kei-Dei Sư ăn boih tơdrong pran kơtang kơ ih; Ơ Kră Yang 'Bok Kei-Dei, tơ'bôh ăn bĕ tơdrong mơsêh Ih mă tơdrong jang Ih đei pơm kơ lu nhôn.

²⁹ Yua kơ Hnam akŭm Ih tơ pơlei Jêrusalem. Lu pơtao gô pơyơ̆r Tơmam Soi kơ Ih.

³⁰ Hil bĕ kơ lu kon sem bri tơ lăm 'nhĕt pơtăng, Hil bĕ kơ lu rơmo tơno păng lu kon iĕ rơmo kon pơlei; Dĭng dôm lu bơngai hơtơ̆p kŭl-tăng pơyơ̆r hu. Ih puh tơweh lê̆ lu bơngai mă 'maih tơblah tơblŭng.

³¹ Lu bơngai tơpăt gô lĕch đơ̆ng char Êyiptơ. Bơngai Êthiôpi gô hăt hot yơ̆r ti krao apinh Kră Yang 'Bok Kei-Dei.

³² Ơ lu dêh char kơpal teh, hơri bơnê bĕ kơ Kră Yang 'Bok Kei-Dei; Hat hơri bĕ kơ Kră Yang. Sêla

³³ Noh jơ̆ Kră Yang mă hao kơpal lu plĕnh, lu plĕnh so sơ̆. To Sư tơlĕch nơ̆r, nơ̆r Sư pơma mơsêh re jơwa dêh.

³⁴ Athei pôk pơư pơang tơdrong mơsêh Kră Yang 'Bok Kei-Dei. Tơdrong ư-ang krưp rŏ Sư oei tơ kơpal Isơrael păng tơdrong pran kơtang Sư oei tơ lu tăl plĕnh.

³⁵ Ơ Kră Yang 'Bok Kei-Dei, Ih trŏ boih kơ nhôn hli kơkuh lăm anih 'lơ̆ng rơgoh. Ih Kră Yang 'Bok Kei-Dei ăn tơdrong pran păng mơsêh mơyang kơ kon pơlei Isơrael Ih. Kơkuh bơnê bĕ kơ Kră Yang 'Bok Kei-Dei!