Horiso 67 - Sơ̆p Hlabơar Nơ̆r 'Bok Kei-DeiHơri bơnê bĕ kơ Kră Yang 'Bok Kei-Dei Nơ̆r hơri. Ăn kơ lu thây bơtho, yua hăm Brŏ tơlei. 1 Hơpơi apinh Kră Yang 'Bok Kei-Dei 'mêm mơnat păng ăn tơdrong pŭn hiôk kơ lu nhôn. Pơdah muh măt Ih tơ lu nhôn. Sêla 2 Wă kơ trong Ih đe gơh băt tơ kơpal teh. Păng tơdrong dŏng pơklaih Ih gơh băt tơ jơ̆p lăm lu dêh char. 3 Ơ Kră Yang 'Bok Kei-Dei ăn kơ kon pơlei kơkuh bơnê kơ Ih! Ăn kơ đĭ-đăng kon bơngai hơri bơnê kơ Ih! 4 Ơ jơ̆p kơ teh đak chơt hiôk hơri 'nă hal bĕ; Yua kơ Kră Yang 'Bok Kei-Dei Sư sek tơlang tơpăt ăn kơ kon pơlei. Păng pơgơ̆r chông ba kon bơngai. Lăm teh đak. Sêla 5 Ơ Kră Yang 'Bok Kei-Dei, ăn kơ kon pơlei kơkuh bơnê kơ Ih! Ăn kơ đĭ-đăng kon bơngai hơri bơnê kơ Ih. 6 Teh pơjing boih kơ lu 'nhot sa hla pơkao. Kră Yang 'Bok Kei-Dei jơ̆ Kră Yang 'Bok Kei-Dei lu nhôn, gô ăn pŭn hiôk kơ lu nhôn. 7 Kră Yang 'Bok Kei-Dei ăn boih tơdrong pŭn hiôk kơ lu nhôn. Ăn kơ kon bơngai jơ̆p teh đak hli yom bĕ kơ Sư. |
©Bahnar Bible Association. All rights reserved.