Horiso 66 - Sơ̆p Hlabơar Nơ̆r 'Bok Kei-Dei

Bơnê kơkuh kơ Kră Yang 'Bok Kei-Dei

¹ Ơ đĭ-đăng lăm teh đak chhôk ngă 'nă hal bĕ kơ Kră Yang 'Bok Kei-Dei.

² Hơri ư-ang kơ anăn Sư păng pôk bơnê kơ Sư bĕ.

³ Pơma bĕ hăm Kră Yang 'Bok Kei-Dei khan: “Dôm tơdrong jang Ih trŏ kơ hli yom tơpă! Đơ̆ng tơdrong mơsêh tih Ih; na dôm lu ayăt gô wih hli yom kơ Ih.

⁴ Jơ̆p-jang kơpal teh đak kơkuh kơ Ih. Hơri bơnê kơ ih. Lu sư hơri bơnê anăn Ih.” Sêla

⁵ Năm lăng, bĕ dôm tơdrong jang Kră Yang 'Bok Kei-Dei: Tơdrong jang Sư pơm kơ kon bơngai trŏ hli yom tơpă.

⁶ Sư tơplih đak dơsĭ jing teh hrĕng kro. Kon bơngai yak jơ̆ng tŏk kơ đak krong. Bĕ bơ̆n chơt hiôk lăm Sư.

⁷ Sư yua tơdrong mơsêh mơyang Sư pơgơ̆r ling-lang hloi; Măt Sư sek lăng lu dêh char: Ơ lu bơngai ayăt 'nĕ kơ pơang. Sêla

⁸ Ơ kon pơlei pơla, kơkuh bơnê bĕ kơ Kră Yang 'Bok Kei-Dei lu bơ̆n. Ăn kơ đe kơtơ̆ng nơ̆r iĕm ư-ang Kơ Sư.

⁹ Sư boih bơwei tơdrong arih lu bơ̆n. Ưh kơ ăn jơ̆ng lu bơ̆n tơpling.

¹⁰ Yua kơ, ơ Kră Yang 'Bok Kei-Dei ih pơlong lăng lu nhôn thoi rơ̆ Hu.

¹¹ Ih ba lu nhôn puh lăm hơnhuăl. Ih tơpŭ ăn tơ kơdŭ lu nhôn trăp dêh.

¹² Ih ăn kơ đe hao tơ kơpal kơ̆l lu nhôn; Lu nhôn năm hlôi kơ đak, yak mơ̆t hlôi kơ ŭnh Mă-lei Ih ăn kơ lu nhôn lĕch năm tơ anih đei tơmam sa rơkah rơkai.

¹³ Inh gô iŏk tơmam soi 'buh na mơ̆t lăm hnam Ih. Pơkeh kơ nơ̆r đêl inh pơkă hăm Kră Yang.

¹⁴ Đêl hơkŭng inh đei pơkă; Mă 'bơ̆r inh pơma, 'bơ̆t năr pơmat-tat.

¹⁵ Inh pơyơ̆r kơ Kră Yang sem dơrong bek 'lơ̆ng wă pơm tơmam soi 'buh. Hơdai hăm triu tơno pơm tơmam soi 'buh. Inh kư̆m gô pơyơ̆r lu rơmo tơno păng bơbe bram. Sêla

¹⁶ Ơ lu bơngai mă băt hli yom kơ Kră Yang 'Bok Kei-Dei, mơ̆ng bĕ. Inh gô roi dôm tơdrong mă Kră Yang đei pơm kơ bơhngol inh;

¹⁷ 'Bơ̆r inh krao apinh Sư, păng hơpiĕt inh ư-ang kơ Sư.

¹⁸ Tơdah jơhngơ̆m inh mong răk tơdrong kơnê̆; Lei Kră Yang 'Bok Kei-Dei kuă kơ mơ̆ng nơ̆r inh.

¹⁹ Tơpă Kră Yang 'Bok Kei-Dei mơ̆ng boih; Sư pơgling boih đon mơ̆ng nơ̆r inh krao khan.

²⁰ Kơkuh bơnê kơ Kră Yang 'Bok Kei-Dei, yua kơ sư ưh kơ đei sơngah kơ nơ̆r inh krao khan. Kŭm ưh kơ đei lê̆ iŏk tơdrong Sư 'mêm kơ inh.