Horiso 64 - Sơ̆p Hlabơar Nơ̆r 'Bok Kei-Dei

Krao apinh Kră Yang 'Bok Kei-Dei pơklaih đơ̆ng lu ayăt hlơp

¹ Ơ Kră Yang 'Bok Kei-Dei, apinh Ih mơ̆ng nơ̆r inh ôr krao. Wei tơdrong arih inh huay kơ hli kơ lu ayăt.

² Ôn inh hlơp đơ̆ng lu bơngai kơnê̆ chă đon noh. Păng đơ̆ng lu bơngai tơpôl pơm kơnê̆.

³ Lu sư pat hơpiĕt thoi pat đao. Lu sư prah 'brơ̆m wă khan nơ̆r pơma jĭ.

⁴ Đơ̆ng anih hlơp noh, lu sư prah klĕnh tơ lu bơngai tơpăt 'lơ̆ng: 'Bôh 'băi blư lu sư prah ưh pă hli kơ kiơ.

⁵ Lu sư pơtơm băl pơm tơdrong kơnê̆ lu sư. Pơđâu băl wă hơ'năk hơđong hlơp, Na khan: “Bu 'bôh 'băi bơ̆n.”

⁶ Lu sư chă wă pơm tơdrong kơnê̆; Lu sư khan: “Lu bơ̆n pơđâu boih wă pơm.” Đon tơchĕng păng jơhngơ̆m kon bơngai kơnê̆ tơpă.

⁷ Mă-lei Kră Yang 'Bok Kei-Dei gô prah lu sư. 'Bôh 'băi lu sư đei rơka đơ̆ng 'brơ̆m.

⁸ Kră Yang gô pơlôch lu sư, hơpiĕt lu sư gô blah plơ̆ lu sư kơdih; Đĭ-đăng lu bơngai 'bôh lu sư gô tơtreh kơ̆l.

⁹ Đĭ-đăng kon bơngai gô hli; Lu sư gô ră roi tơdrong Kră Yang 'Bok Kei-Dei pơm boih.

¹⁰ Lu bơngai tơpăt gô chơt hiôk lăm Kră Yang păng kơ'nơp tơ lăm Sư; Đĭ-đăng lu bơngai đei jơhngơ̆m tơpăt lu sư gô hơri ư-ang kơ sư.