Horiso 61 - Sơ̆p Hlabơar Nơ̆r 'Bok Kei-Dei

Apinh gơnang kơ Kră Yang 'Bok Kei-Dei dŏng tơgŭm

¹ Ơ Kră Yang 'Bok Kei-Dei apinh Ih mơ̆ng nơ̆r inh krao ôr. Mơ̆ng nơ̆r inh krao khan.

² Đơ̆ng tôch kơ teh đak, inh gô ôr krao Ih, tơdah jơhngơ̆m inh rơdu boih; Apinh Ih chông ba inh 'bơ̆t tơmo kơjung hloh kơ inh.

³ Yua kơ Ih jơ̆ anih inh kơ'nơp; Minh pôm hnam thôt kơjăp, wă blah lu ayăt.

⁴ Ăn kơ inh oei lăm hnam khăn Ih ling-lang. Păng kơ'nơp tơ ala pơnăr Ih. Sêla

⁵ Ơ Kră Yang 'Bok Kei-Dei, Ih kơtơ̆ng boih nơ̆r inh pơkă. Ih Jao ăn boih kơ inh mŭk tơmam lu bơngai mă chu yom kơ anăn Ih.

⁶ Apinh Ih hơtŏk thim năr kơ pơtao arih. Ăn kơ sư arih lăm lơ jơhnơr.

⁷ Ăn kơ sư pơyơ̆r 'bơ̆t anăp ling-lang hloi.a Apinh Ih ăn tơdrong 'mêm mơnat sĭt, wă kơ wei-lăng sư.

⁸ Thoi noh inh gô hơri bơnê kơ anăn ling-lang. Păng rim năr pơm pơkeh dôm tơdrong inh pơkă.