Horiso 6 - Sơ̆p Hlabơar Nơ̆r 'Bok Kei-Dei

Krao khan apinh Kră Yang mơnat ăn lăm năr đei gleh truh

¹ Ơ Kră Yang! 'Nĕ chrih kơ inh lăm năr Ih blĕk, 'Nĕ kơ bơtho pơjĭ inh lăm năr Ih hil!

² Ơ Kră Yang, apinh Ih mơnat kơ inh, yua kơ inh rơdu tơrăn; Ơ Kră Yang, pơklaih inh, yua kơ kơting inh tơtơ̆.

³ Ơ Kră Yang! Bơhngol inh hli tơtăm dêh. Bĭ Ih, ơ Kră Yang! Wă gô dang yơ?

⁴ Hơlơ̆k pơklaih, bơhngol inh bĕ, Ơ Kră Yang; Yua kơ tơdrong Ih 'mêm mơnat, apinh Ih dŏng pơklaih inh

⁵ Yua kơ lăm tơdrong lôch đe pă đei 'blŏk kơ Ih bơih. Lăm pơlei lôch hăm pă đei bu bơnê ư-ang kơ Ih?

⁶ Jơhngơ̆m inh đĭ boih, yua kơ inh ôr krao, Rim măng inh nhơ̆m, dĭng giơng mah hơiuh.

⁷ Măt inh hrŏ yua kơ sơ'ngon, Sư jing rơgah yua kơ lu ayăt kơ inh.

⁸ Ơ lu pơm kơnê̆ noh, weh bĕ đĭ-đăng ataih đơ̆ng inh, Yua kơ Kră Yang kơtơ̆ng boih nơ̆r inh nhơ̆m ôr.

⁹ Kră Yang mơ̆ng boih nơ̆r inh krao apinh; Ih iŏk boih tơdrong inh krao khan.

¹⁰ Đĭ-đăng lu ayăt kơ inh gô mơlâu, klaih kơ noh hli tơrơ tơpă; lu sư kơdŭn kơdâu, hăt hot yua kơ mơlâu dêh.