Horiso 57 - Sơ̆p Hlabơar Nơ̆r 'Bok Kei-DeiKrao khan gơnang kơ Kră Yang tơgŭm Tơdrong hơri Đawit pơm, kơplah Sư kơdâu ôn, kơ Sôl lăm trôm tơmo. Ăn kơ lu thây bơtho hơri kiơ̆ tơ'nguơ̆ “'nĕ kơ pơrăm”. 1 Ơ Kră Yang 'Bok Kei-Dei! Apinh mơnat kơ inh, apinh mơnat kơ inh; Yua kơ bơhngol inh kơ'nơp tơ lăm Ih. Inh gô kơ'nơp tơ ala pơnăr Ih. Dĭng hloh kơ năr kơnê̆ pă đei. 2 Inh krao apinh Kră Yang 'Bok Kei-Dei Tih Hloh. Kră Yang 'Bok Kei-Dei mă pơm pơsĭt tôm tơdrong kơ inh. 3 Sư tơjur ăn đơ̆ng plĕnha tơdrong dŏng pơklaih inh. Sư gô hil chrih kơ lu bơngai pơjuă inh. Sêla Kră Yang 'Bok Kei-Dei gơih ăn tơdrong 'mêm mơnat păng tơdrong tơpăt Sư. 4 Bơhngol inh oei tŏk-bŏk dăm-brang Inh 'bĭch tŏk-bŏk lu sem bri sa bơngai. Mă đei hơnĕnh thoi tơju păng thoi 'brơ̆m, Hơpiĕt lu sư nhen đao suĕng han. 5 Ơ Kră Yang 'Bok Kei-Dei, ăn kơ anăn Ih kơkuh pơyom hloh kơ plĕnh. Ăn tơdrong ư-ang tơ jơ̆p kơpal kơ teh! 6 Lu sư dăng hơnhuăl kơ jơ̆ng inh. Bơhngol inh rơdu rơmơ̆n. Lu sư sir sơlŭng 'bơ̆t anăp inh. Mă-lei lu sư huŏng kơdih tơ lăm noh. Sêla 7 Ơ Kră Yang 'Bok Kei-Dei jơhngơ̆m inh kơjăp, jơhngơ̆m inh kơjăp boih. Inh gô hơri păng hơri bơnê Kơ Sư. 8 Hơđơ̆r bĕ ơ bơhngol inh! Ơ tĭng-nĭng păng brŏ tơlei, hơdơ̆r bĕ! Inh kư̆m hơdơ̆r đơ̆ng hrôih. 9 Kră Yang inh gô hơri bơnê kơ Ih lăm kon pơlei pơla. Hơri bơnê kơ Ih tơ jơ̆p kơ teh đak. 10 Yua kơ tơdrong 'mêm mơnat Ih truh tơ plĕnh. Tơdrong 'lơ̆ng tơpăt Ih kơjung truh tơ hơmơ̆l. 11 Ơ Kră Yang 'Bok Kei-Dei ăn kơ anăn Ih kơkuh pơyom hloh tơ kơpal plĕnh. Ăn kơ tơdrong ư-ang Ih tơ jơ̆p kơ teh đak. |
©Bahnar Bible Association. All rights reserved.