Horiso 5 - Sơ̆p Hlabơar Nơ̆r 'Bok Kei-Dei

Krao khan apinh Kră Yang dŏng đơ̆ng tơdrong kơnê̆

¹ Ơ Kră Yang, apinh Ih pơgling đon mơ̆ng nơ̆r inh, lăng bĕ dôm tơdrong inh tơtok.

² Ơ Pơtao inh, Kră Yang 'Bok Kei-Dei inh, apinh mơ̆ng nơ̆r inh krao khan, Yua kơ inh krao apinh Ih.

³ Ơ Kră Yang! Pơgê hrôih Ih gô kơtơ̆ng nơ̆r inh; Pơgê hrôih inh gô roi dôm tơdrong kiơ 'bơ̆t anăp Ih păng chang gô.

⁴ Yua kơ Ih ưh kơ trŏ kơ Kră Yang 'Bok Kei-Dei mă lăp đon tơdrong kơnê̆, lu bơngai kơnê̆ ưh kơ gơh ôh oei hơdai Ih.

⁵ Lu bơngai pơang ưh kơ kĕ dơ̆ng 'bơ̆t anăp Ih ôh; Ih areh kơ đĭ-đăng lu bơngai pơm kơnê̆.

⁶ Ih gô pơrăm đĭ lu bơngai pơm pơma hơlĕnh, Ih areh kơ lu bơngai pơlôch đe, Hăm lu bơngai sa pơgâm.

⁷ Gah inh gơnang kơ tơdrong 'mêm tih Ih, inh gô mơ̆t tơ lăm hnam Ih. Iŏk jơhngơ̆m hli yom kơ Ih na drap kơkuh 'bơ̆t anih 'lơ̆ng rơgoh Ih.

⁸ Ơ Kră Yang, yua kơ lu ayăt kơ inh, thoi noh iŏk tơdrong tơpăt Ih dui ba inh, Pơm mă tơhnă trong Ih 'bơ̆t anăp inh.

⁹ Yua kơ lăm 'bơ̆r lu sư ưh kơ đei tơdrong tơpă; Jơhngơ̆m lu sư tă kơnê̆ ngăl. Hơlŏng lu sư thoi bơsat tơpơih Hơpiĕt lu sư 'bĕnh hăm tơdrong pơdăr.

¹⁰ Ơ Kră Yang, phak lu sư bĕ; Ăn kơ lu sư pơ̆k huŏng tơ lăm tơdrong lu sư pơđâu; Pơpuh bĕ lu sư yua kơ tơdrong yoch kơnê̆ lu sư lơ tơpă, Yua kơ lu sư blah Ih.

¹¹ Mă-lei bu gơnang kơ Ih gô oei hiôk chơt, lu sư gô hơri chơt hiôk ling-lang. Apinh Ih wei-lăng lu sư. Bơngai bu 'mêm kơ anăn Ih kư̆m gô 'nă hal lăm Ih.

¹² Ơ Kră Yang, yua kơ Ih gô ăn tơdrong pŭn hiôk kơ lu bơngai tơpăt, Iŏk đon 'mêm mơnat pĕng lu sư thoi khêl.