Horiso 41 - Sơ̆p Hlabơar Nơ̆r 'Bok Kei-Dei

Lăm năr jĭ jăna tơhôih kơ lu ayăt hăm lu buăl juăt hơlĕnh

¹ Pŭn dêh bơngai bu mă 'blŏk tơtăm bơngai rơdu tơrăn! Lăm năr anat anot Kră Yang gô tơgŭm dŏng sư.

² Kră Yang gô wei-lăng păng wei wêr tơdrong arih sư. Sư gô đei pŭn hiôk kơpal teh păng Kră Yang ưh kơ đei lê̆ bơngai noh kiơ̆ thoi lu ayăt kơ sư wă,

³ Kră Yang tơgŭm sư kơplah sư oei jĭ 'bĭch kơpal giơng păng pơklaih tơdrong jĭ bơlŏ sư.b

⁴ Inh khan: “Ơ Kră Yang! Apinh Ih mơnat kơ inh, pơklaih bơhngol inh, yua kơ inh pơm yoch boih hăm Ih.”

⁵ Lu bơngai ayăt kơ inh, hiap inh: “Sư gô lôch layơ? Anăn sư gô hiong layơ?”

⁶ Tơdah lu bơngai năm hơpong kơ inh, pơma hơlĕnh kơ inh. Jơhngơ̆m lu sư 'bĕnh kơ tơdrong kơnê̆, lu sư lĕch tơ 'nguaih ră roi tơdrong noh.

⁷ Đĭ-đăng lu areh kơ inh, kư̆m hơnganh kơ inh, Lu sư chă đon wă pơrăm inh.c

⁸ Lu sư khan: “Sư jĭ kơnê̆ boih,” ưh pă kĕ layơ iung dơ̆ng. Đơ̆ng anih sư 'bĭch

⁹ Truh tơ buăl inh juăt, d Mă inh gơnang bơngai mă sa boih 'bĕng inh, Kŭm hiŏng kơnơl wă 'lơ̆r inh.

¹⁰ Ơ Kră Yang 'Bok Kei-Dei! Apinh mơnat kơ inh păng tơgŭm dŏng inh, Wă kơ inh gơh pơm tơwih kơ lu sư.

¹¹ Tơdah lu ayăt ưh pă kĕ jei đơ̆ng noh boih inh băt kơ Ih lăp đon kơ inh.

¹² Na, đơ̆ng tơdrong tơpăt inh, Ih tơiung inh, Ăn inh kơjăp 'bơ̆t anăp Ih ling-lang.

¹³ Trŏ kơkuh bơnê kơ Kră Yang Kră Yang 'Bok Kei-Dei Isơrael Đơ̆ng âu truh tơ ning-mônh ling-lang A-men, A-men!