Horiso 4 - Sơ̆p Hlabơar Nơ̆r 'Bok Kei-DeiTơdrong krao khan kơsơ̆ Tơdrong hơri Đawit pơm ăn kơ thây lu hơri păng brŏ tơlei 1 Ơ Kră Yang 'Bok Kei-Dei inh, mă 'lơ̆ng tơpăt, Tơl tơwih nơ̆r inh, dah inh krao khan. Ih pơklaih inh boih, lăm năr inh oei pơmat, Apinh Ih mơnat kơ inh, păng tơl nơ̆r inh krao khan. 2 Ơ kon bơngai! Tơdrong ư-ang inh, iĕm wă pơjăm dĭng dang yơ? Lu iĕm 'mêm kơ tơdrong kư̆ kă 'maih chă tơdrong hơlĕnh dĭng dang yơ dơ̆ng? 3 Athei băt Kră Yang 'măn lê̆ boih dôm lu bơngai mă chu yom kơ Sư. Dah inh krao khan kơ Kră Yang Sư gô mơ̆ng nơ̆r inh. 4 Oei bĕ lăm tơdrong hli yom, 'nĕ pă pơm yoch; Tơchĕng bĕ lăm jơhngơ̆m, kơplah ih oei 'bĭch kơpal giơng păng ngăn bĕ. Sêla 5 Pơyơ̆r bĕ tơmam soi mă 'lơ̆ng tơpăt, Păng lui gơnang kơ Kră Yang 'Bok Kei-Dei. 6 Đei lơ bơngai apinh: “Bu gơh tơ'bôh ăn kơ bơ̆n tơdrong pŭn hiôk” Ơ Kră Yang, pơchrang bĕ tơdrong hơdah đơ̆ng muh măt Ih, tơ lu nhôn. 7 Kră Yang, Ih ăn boih kơ inh tơdrong chơt hiôk dêh. Hloh kơ lu sư chơt hiôk đei 'ba mi lơ, păng sik đak hơmu rơkah rơkai 8 Ơ Kră Yang, inh gô 'bĭch păng tep hiôk-hian; Yua kơ lăp minh 'nu Ih đĕch ăn kơ inh oei hiôk rơnŭk. |
©Bahnar Bible Association. All rights reserved.