Horiso 39 - Sơ̆p Hlabơar Nơ̆r 'Bok Kei-Dei

Tơdrong răm lăm tơdrong arih

¹ Inh khan: “Inh gô bơwei tơdrong arih sa inh, Wă kơ inh yua hơpiĕt inh, huay kơ pơma yoch, Kơplah lu bơngai kơnê̆ oei dơ̆ng 'bơ̆t anăp inh, Inh gô iŏk 'bông pơhơ̆p lê̆ 'bơ̆r inh.”

² Inh ĕnh pơăm, ưh pă đei pơma, Dĭng mah nơ̆r 'lơ̆ng pă đei lĕch đơ̆ng 'bơ̆r inh, Tơdrong pơmat-tat inh rai tŏk.

³ Lăm, jơhngơ̆m klơm klak tŏ hang, kơplah inh oei tơchĕng, ŭnh sa hloi. Kơplah noh hơpiĕt inh đei nơ̆r pơma:

⁴ “Ơ Kră Yang, apinh Ih ăn kơ inh băt kơ năr tôch inh, Păng băt kơ dôm năr inh oei arih Ăn kơ inh băt kơ tơdrong arih inh hơtăng hơtŏ dang yơ.

⁵ To, Ih pơm ăn kơ jơ 'năr inh kơjung lăp tŏ pah đĕch, Păng tơdrong arih thoi hoh-hoy đĕch 'bơ̆t anăp Ih. Sĭt tơpă, rim bơngai mă khan oei kơjăp, Kŭm lăp thoi dui jơhngơ̆m. Sêla

⁶ Tơpă rim 'nu yak năm, thoi lĕ kơ yơ̆p. Sư bơ̆jang gleh lap, tơdrong kơ đei. Bơngai mă mong mŭk tơmam, mă-lei ưh kơ băt bu wă iŏk yua.

⁷ Ơ Kră Yang, dang ei inh chang gô yă kiơ? Tơdrong inh chang gô tơ lăm Ih.

⁸ Apinh Ih pơklaih inh đơ̆ng dôm tơdrong yoch inh pơm. 'Nĕ ăn kơ bơngai ưh kơ hlôh pơm kơ inh mơlâu.

⁹ Inh ngăn ưh pă đei ha 'bơ̆r, Yua kơ Ih pơm tơdrong noh.

¹⁰ Apinh Ih iŏk lê̆ tơdrong teh bơtho đơ̆ng inh. Inh gleh pă kĕ đơ̆ng ti Ih teh bơtho.

¹¹ Kơplah Ih teh bơtho lu kon bơngai yua kơ tơdrong kơnê̆ lu sư. Na Ih pơm ăn tơdrong lu sư 'maih wă huach thoi bŭk răm. Sĭt tơpă, rim 'nu thoi kial dui jơhngơ̆m. Sêla

¹² Ơ Kră Yang 'Bok Kei-Dei! Mơ̆ng bĕ nơ̆r inh krao apinh, mơ̆ng bĕ nơ̆r inh krao ôr. Apinh Inh 'nĕ kơ chĭt đon kơ đak măt inh nhơ̆m. Yua kơ inh thoi bơngai tơmoi. Bơngai tơmoi mă oei thoi yă 'bok inh.

¹³ Ơ Kră Yang! Apinh Ih mơnat kơ inh. Wă kơ inh đei jơhngơ̆m dơ̆ng, Adrol kơ inh wă năm păng ưh pă đei dơ̆ng.”