Horiso 37 - Sơ̆p Hlabơar Nơ̆r 'Bok Kei-Dei

Lu bơngai ayơ gơnang kơ Kră Yang gô đei hiôk-hian, gah lu bơngai kơnê̆ gô hli pơmat

¹ 'Nĕ kơ tơtăm kơ đe pơm kơnê̆, Kŭm 'nĕ kơ gar 'ngeng kơ lu bơngai pơm kơnê̆.

² Thoi 'nhĕt lu sư gô jô kro păng thoi 'nhĕt hơdrih lu sư gô jô hŏnh.

³ Gơnang bĕ kơ Kră Yang păng pơm 'lơ̆ng. Oei bĕ lăm dêh char păng oei arih lăm tơdrong 'lơ̆ng tơpăt Sư.

⁴ Hiôk chơt bĕ lăm Kră Yang, na Sư gô ăn kơ ih tơdrong kiơ ih 'maih wă.

⁵ Jao bĕ trong bơ̆n kơ Kră Yang. Păng gơnang kơ Sư. Na Sư gô pơkeh tơdrong noh,

⁶ Sư gô pơdah tơdrong tơpăt ih thoi hơdah hơdong Păng sek tơ'bôh tơdronga trŏ ih thoi 'năr dơ̆ng.

⁷ Oei hreh bĕ 'bơ̆t anăp Kră Yang păng chang gô Sư. 'Nĕ kơ ơh klai yua kơ lu đe đei pŭn hiôk lăm trong lu sư. Dah yua kơ bơngai noh pơm keh lu tơdrong kơnê̆.

⁸ Ĕnh bĕ kơ hil păng lê̆ pă blĕk; Lê̆ kơ hiơ̆k tơdrong noh gô truh kơ tơdrong kơnê̆.

⁹ Yua kơ lu bơngai kơnê̆ gô răm đĭ; Mă-lei gah lu bơngai chang gô Kră Yang gô đei teh jang sa.

¹⁰ Pă 'biơ̆ kơnh lu bơngai kơnê̆ ưh pă đei. Mă Ih chă lăng tơ anih sư, kư̆m pă đei 'bôh dơ̆ng.

¹¹ Mă-lei lu bơngai 'lơ̆ng tơpăt gô đei teh jang sa. Păng 'nă hal lăm tơdrong rơnŭk rơnua tih.

¹² Lu bơngai kơnê̆ pơđâu wă pơm kơnê̆ kơ bơngai tơpăt, Păng hơnganh kăp hơnĕnh kơ lu sư.

¹³ Kră Yang gô hiĕk kơ lu sư, Yua kơ 'bôh khei 'năr wă phak lu sư wă jê̆ boih.b

¹⁴ Lu bơngai kơnê̆ toh đao, Păng gŭt hră lu sư, Wă blah pơrăm lu bơngai pơmat-tat hăm lu bơngai dơnuh hin, Wă pơlôch lu bơngai kiơ̆ tơdrong tơpăt.

¹⁵ Đao lu sư gô 'bet jơhngơ̆m lu sư kơdih, Păng hră lu sư gô tơgơ̆.

¹⁶ Tơmam lu bơngai tơpăt tŏ sĕt ră, Mă-lei đei 'lơ̆ng hloh kơ tơmam lu bơngaic kơnê̆ đei rơkah rơkai.

¹⁷ Yua kơ kơkŏng ti lu bơngai kơnê̆ gô tơgơ̆, Mă-lei Kră Yang gô tưk pơkơ̆ng ti lu bơngai tơpăt.

¹⁸ Kră Yang băt năr lu bơngai tơpăt, Păng mŭk tơmam lu sư oei đei ling-lang.

¹⁹ Lăm năr anat anot lu sư ưh kơ đei mơlâu; Lăm năr pơngot rơwĕt lu sư đei phĭ rơkah.

²⁰ Gah lu bơngai kơnê̆ gô lôch răm, Lu bơngai ayăt kơ Kră Yang gô jing thoi tơmăn 'nhĕt bluh 'lơ̆ng.d Lu sư gô hach, hiong thoi 'nhui ŭnh.

²¹ Lu bơngai kơnê̆ tŏk iŏk, na pơdrâu ưh kơ kĕ. Gah lu bơngai tơpăt hơmrah păng asong tŏk iŏk.

²² Yua kơ lu bơngai mă Kră Yang ăn pŭn hiôk gô đei iŏk teh jang sa; Gah lu bơngai mă Sư hiap pơtê̆ gô lôch răm đĭ.

²³ Kră Yang wei kơjăp boih rim yak, Păng Sư lăp đon kơ trong lu sư:

²⁴ Mă sư kơtơih, kư̆m huay kơ pơ̆k; Yua kơ Kră Yang gô pôk tơiung sư.

²⁵ Sơ̆ inh oei 'lơ̆p, dang ei kră boih, tim 'bôh lu bơngai tơpăt khan đe achăng lê̆, Dah lu kon sâu sư chă apinh sa.

²⁶ Rim năr sư hơmrah păng asong ăn đe tŏk iŏk; Kon sâu sư đei pŭn hiôk.

²⁷ Weh bĕ dơ̆ng tơdrong kơnê̆ păng pơm tơdrong 'lơ̆ng, Na gơh oei arih ling-lang.

²⁸ Kră Yang lăp đon kơ tơdrong tơpăt, Ưh kơ đei achăng lê̆ lu bơngai 'lơ̆ng rơgoh Sư; Lu sư đei Kră Yang wei-lăng ling-lang: Mă-lei gah lu adrĕch adrung bơngai kơnê̆ gô răm đĭ.

²⁹ Lu bơngai tơpăt gô đei teh, Păng oei hloi tơ noh ling-lang.

³⁰ 'Bơ̆r lu bơngai tơpăt pơma lĕch gơh hơgei, Păng hơpiĕt sư roi tơdrong tơpăt.

³¹ Khôi juăt Kră Yang 'Bok Kei-Dei oei lăm jơhngơ̆m sư; Rim yak sư huay kơ tơpling.

³² Lu bơngai kơnê̆ hơrum tăp kơ lu bơngai tơpăt, Wă chă pơlôch.

³³ Kră Yang ưh kơ ăn sư lăm ti lu bơngai kơnê̆. Kŭm ưh kơ ăn đei jâu sư mơ̆n lăm năr sek tơlang.

³⁴ Chang gô bĕ Kră Yang păng wei kiơ̆ trong Sư, Sư gô hơtŏk ih wă kơ đei teh! Mưh lu kơnê̆ răm đĭ, Ih gô 'bôh tơdrong noh.

³⁵ Inh 'bôh boih lu bơngai kơnê̆ đei pran kơtang, Tih kơjung thoi 'long hơngo, chăt tơ char Liban.

³⁶ Mă-lei đei bơngai yak rok ei to, Sư pă 'bôh boih; Inh chơchă sư, mă-lei pă tơ'bơ̆p boih.

³⁷ Lăng bĕ tơ lu bơngai 'lơ̆ng păng lăng lu bơngai tơpăt; Yua kơ tuch-luch lu bơngai tơpăt gô đei tơdrong hiôk-hian.e

³⁸ Gah lu bơngai yoch lu sư gô pŭ tơdrong răm hơdai; Tơdrong chơt hiôk đe gô pơrăm đĭ tơ anăp lu bơngai kơnê̆.

³⁹ Tơdrong dŏng tơgŭm lu bơngai tơpăt truh đơ̆ng Kră Yang gô; Sư jing anih kơjăp lăm năr anat anot.

⁴⁰ Kră Yang tơgŭm pơklaih lu sư; Sư pơklaih lu sư dơ̆ng lu bơngai kơnê̆ păng tơgŭm dŏng lu sư, Yua kơ lu sư kơ'nơp boih lăm Kră Yang.