Horiso 36 - Sơ̆p Hlabơar Nơ̆r 'Bok Kei-Dei

Tơdrong hơri đơ̆ng Đawit đĭch đam Kră Yang pơm. Ăn kơ thây bơtho

¹ Tơdrong kơnê̆ lu bơngai pơm kơnê̆ khan tơ lăm jơhngơ̆m inh. Ưh kơ đei tơdrong hli yom kơ Kră Yang 'Bok Kei-Dei 'bơ̆t anăp sư.

² 'Bơ̆t anăp măt sư pơang kơdih khan: Tơdrong yoch kơnê̆ ưh kơ đei layơ đe băt păng ưh kơ đei bu areh.

³ Lu nơ̆r lĕch đơ̆ng 'bơ̆r sư tă kơnê̆ hơlĕnh ngăl ưh pă pơm tơdrong tơpăt pơm 'lơ̆ng trŏ.

⁴ Sư tơchĕng wă pơm kơnê̆ kơplah oei kơpal giơng, Sư kiơ̆ trong ưh kơ 'lơ̆ng, sư ưh kơ achăng lê̆ tơdrong kơnê̆.

⁵ Ơ Kră Yang, tơdrong 'mêm Ih kơjung tĭk kơ plĕnh Tơdrong tơpăt ih truh tơ hơmơ̆l kok.

⁶ Tơdrong 'lơ̆ng tơpăt Ih nhen thoi kông tih.a Tơdrong Ih sek tơlang tơpăt thoi sơlŭng jrŭ. Ơ Kră Yang, Ih wei rongb kon bơngai păng sem brem.

⁷ Ơ Kră Yang, tơdrong 'mêm mơnat gĭt pă băt dang yơ! Kon bơngai năm kơ'nơp ala pơnăr Ih.

⁸ Lu sư gô et sa hiôk hrăp rơkah rơkai lăm hnam Ih Ih gô ăn kơ lu sư nhă đak krong hiôk-hian Ih.

⁹ Yua kơ tơm tơdrong arih oei tơ Ih, Lăm tơdrong hơdah Ih nhôn 'bôh hơdah,

¹⁰ Apinh oei 'mêm mơnat kơ lu bơngai băt kơ Ih. Păng ăn tơdrong tơpăt Ih kơ lu bơngai đei jơhngơ̆m tơpăt.

¹¹ 'Nĕ ăn jơ̆ng lu bơngai pơang druh tam inh Kŭm 'nĕ ăn ti lu bơngai pơm kơnê̆ puh tơweh inh.

¹² Toc lu bơngai pơm kơnê̆ gô pơ̆k huŏng. Đe gô tơlơ̆ pơ̆k, ưh pă kĕ iung dơ̆ng.